《唔再一齊讀書工作，連約食飯都變得極難》

約一班朋友食飯，自古以嚟都係一場角力，邊個開口做主動，邊個就要承擔起全盤責任，淨係夾日子已經係史上大嘅難題。永遠都有個人好忙，唔知忙咩，又永遠有幾個唔應機，或者話要遲啲答⋯⋯所 以好多時未夾好日子已經自動收線，放棄好似更快。

我WhatsApp裡面都有好多呢類Group，隔一兩個月就有人會拋下一句：「幾時食飯呀？」，十個人嘅group都會有一兩個客套回應下：「好呀！」「呢排好忙，下個月啦」⋯⋯然後又係一片沉默。實在有太多前車可鑒，呢啲group通常講足一年都未食到一次飯。而通常呢啲group都係好耐無見嘅朋友，舊同學，舊同事⋯⋯已經淡出哂彼此生命嘅人，即使當日曾經幾好朋友，今日連約食個飯都mission impossible。

有時我會諗，係咪曾經幾Friend都好，大家分開工作分開讀書太耐，都會走上同一個結局？

或者唔係。慶幸我仲有一班係可以約到出去食飯又齊人嘅朋友群。我諗由始至終都係priority 嘅問題，每個人都好忙，但如果係你另一半約你，我相信今晚聽晚後晚你都會搵到時間出去。但如果係一班唔係太重要，好耐無見，根本無咩交集嘅朋友約你，你總會諗到更多更重要嘅事，連同屋企人食飯都突然變得非常非常重要。人去茶涼，大概就係呢個意思。一班人離開大家太耐，已經無咩共同話題嘅朋友，連花幾個鐘都覺得好奢侈。

港女友Facebook