【唔准外傭姐姐同老公講嘢?】訂立嚴格家規,不如講清底線!

撰文:茄莉姨姨

【親子王國分享】

屋企多咗外傭姐姐幫手,要日對夜對,想避免有磨擦,有好多家庭請外傭姐姐前都會先小人後君子,訂哂規條都好正常。不過早前有網民喺討論區出帖:「唔准菲傭同我老公講嘢,有犯法咩?」,呢條規條就未免有啲難做到!



 

有好多網民都回應樓主,當然唔係犯法,但相信樓主控制慾應該好強,鄧佢老公慘,而且生活喺同一個家庭,完全唔講真係好難做到。最搞笑係有網民問,其實用手語又得唔得呢?!網民想知樓主咩原因唔准老公同外傭姐姐交流,不過樓主無再回應喇…

 

先唔好講佢係咪對個老公好無信心,淨係諗到如果下下要我傳話,真心覺得麻鬼煩!老公要外傭姐姐幫手咪自己講囉,請得外傭姐姐就係想幫輕下家務瑣碎事,而家少少嘢都煩到我傳話?!訂呢條規矩嘅網民盞玩死自己…

 

相信請得外傭姐姐幫手,都係想佢幫輕家務,更加想避免有不必要的誤會,所以訂好規矩絕對係好事。我留意到網上有唔少與外傭姐姐生活上的相處小貼士值得參考,可以令到僱傭雙方清楚對方嘅生活習慣及底線,想請工人嘅朋友都可以留意一下吖!



合適衣著:外傭姐姐工作服應該以舒適方便為主,僱主如果擔心外傭姐姐衣著太暴露,不防提供衣物畀外傭姐姐著吖!

避免獨處:有時得返男僱主同外傭姐姐喺屋企,敏感嘅女士難免會擔心;不如就提醒一下老公,暫時行開一陣,以免有誤會,提醒一兩次,老公應該都會「醒水」架喇!

夫妻融洽:如果有咩拗撬,都盡量唔好喺外傭姐姐面前嘈,如果家庭和睦任何人都唔容易介入啦!

樂於溝通:有網民都坦言,見到老公同外傭姐姐好好傾,心入面會酸溜溜…不如同外傭姐姐打好關係,有開心事自然都預埋你一齊笑一齊傾!

 

相關討論:https://www.baby-kingdom.com/forum.php?mod=viewthread&tid=21345608


即睇下一篇:教育學家:不否定聆聽法 孩子渴望父母陪同

其他內容