唔好《一事無成》 8首婚禮地雷歌 咪再播《囍帖街》!

·3 分鐘文章
唔好《一事無成》 8首婚禮地雷歌 點解仲有人播《囍帖街》?
唔好《一事無成》 8首婚禮地雷歌 點解仲有人播《囍帖街》?

《一事無成》事件後,網友都紛紛討論唔同場合揀錯歌事件。慈善show以外,婚禮都係高危「地點」,因為場地、兄弟姊妹以至新人自己,都冇諗清楚就擺落歌單,鬧出笑話!

《囍帖街》

應該係最多人聽過而又最唔適合婚宴播放嘅歌,好多人見「囍帖」就以為貼題,其實內容係描述離婚,一頭家同灣仔囍帖街一樣,面臨清拆命運。結婚播?攞景定贈興先?

《婚紗背後》

有網友話聽過婚宴上響起呢首。唉,歌名有「婚紗」啫,但係講「愛人結婚了新娘不是我」架。撇除呢點,《婚》係劇集《流氓大亨》主題曲,套劇結局係萬梓良嘅太太Do姐昏迷不醒,大吉利是!

《婚禮的祝福》、《阿牛》

唔少新人鍾意Eason於是揀呢2首入歌單,但2首都係以目睹舊愛出嫁嘅男性角度描寫。《婚》歌詞講到「我的請帖是你的囍帖」、「在場的都知道,你我曾那麼好」,好直接好虐心。而《阿牛》仲激,直情係「想過搶新娘,我差點講真」,真心唔知咩?

《甜蜜蜜》

亦有網友點出呢首禁歌,聽落薛凱琪唱得好sweet,歌名又冧,仲有伏?第二句就嚟料「但我想 下嫁的 共你不相似/你不是 從來 也不是」,雖然成首歌都可以解讀成「即使你唔係Mr.Right但我都揀你」,但係大喜日子做場戲都要架吓嘛?

Saving all my Love for You

英文歌向來都係另一死穴,Whitney Houston嘅Saving all my Love for You睇歌名又係浪漫都不得了,歌詞內容都係講一個女人點樣愛到死心塌地……但係呢,女主角個愛人,係有家室架囉。唔係我估架,歌詞寫明You've got your family and they need you there架。除非新娘係搶人老公搶贏啦,咁又冇所謂,直情係勝利宣言添。

《愛是永恆》

學友嘅《愛是永恆》,唔止係婚宴熱門背景音樂,甚至有新郎哥唱俾太太聽。《愛》來自音樂劇《雪狼湖》,唱《愛是永恆》嗰幕,係女主角中槍身亡之後,男主角獻俾最愛嘅輓歌……OK,如果唔理呢點,係好澎湃好呃到like嘅。

《嫁妝》

亦係睇見歌名就以為啱用嘅歌。呢份詞查實係講單身女子準備好嫁妝,但係「嗰個人」一直未出現,喺婚禮播我擔心會整喊某啲姊妹。題外話,填詞嘅Wyman話本來將呢份詞寫俾梅艷芳,但後來梅姐逝世,首歌轉交由陳慧琳唱。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!