嘈嘈閉被李家鼎黑面招呼 安德尊拒絕收聲「佢話乜就乜」
《流行都市》近日新增全新環節「鼎爺家常菜」,由李家鼎一連十星期教家庭觀眾煮餸。鼎爺向來心直口快,即使對住喺節目多口又串串貢嘅「大王」安德尊,一樣爆。安德尊於李家鼎煮食時嘈嘈閉,令鼎爺不時黑面,仲串爆咁話「我未出聲,唔好問嘢住!」。除此之外,鼎爺亦呼喝安德尊要落油「快啲快啲」,嚇到安德尊即時乖乖收聲。
TVB娛樂新聞台就呢單嘢訪問安德尊同《流行都市》另一主持謝芷倫。講起疑似黑面事件,安德尊劈頭就話「火,梗係火啦!」……大家都明白大王梗係搞爛gag。「大家都火熱吖嘛,火爐又夠火,佢煮嘢又夠熱。」
對於被指太大聲又不斷搭嗲辣著鼎爺,大王揚言唔會將音量收細,直情話「一樣咁大聲,佢都咁大聲啦!我不嬲都咁大聲」。之後大王就九唔搭八咁話「鼎爺係我哋前輩,佢有啲咩我就跟住做,佢話乜就乜,呢個好平常」,繼續一輪咀嘅安德尊話「我哋相識幾十年,我哋就咁溝通」。
據知,拍開黃金時段綜藝嘅李家鼎走去拍《流行都市》,係因為佢企硬今年騷就要今年還清,唔想積落下年。而TVB又唔想白白出糧畀佢,於是安排李家鼎拍《流行都市》。過去大王同李錦聯幕前開拖,結果成為另類拍檔,仲一齊主持節目。到底大王同鼎爺嘅互動,係事前度過,定係大王天生同廚師唔夾呢?
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!