【回顧2020.娛樂】《法證先鋒IV》成無綫今年收視最高劇集 咁最低係邊套?

·5 分鐘文章

仲有唔夠10日就到2021年!今年因為新冠肺炎疫情嘅關係,大家多咗留喺屋企防疫,電視成為咗唔少人嘅好朋友。今年無綫推出咗唔少劇集, 當中有備受熱捧嘅佳作, 亦有劇集被指「膠」位太多,而家就同大家回顧一下今年無綫收視最高及最低嘅劇集啦!

最高收視第3位:《殺手》
重頭劇《殺手》演員卡士強勁,除咗有「三屆視帝」黎耀祥及「雙料視帝」陳豪之外,仲有視后「李佳芯」、江美儀、龔嘉欣及高海寧等人主演。除此之外,劇集以破格嘅職業殺手作作為題材,講述曾經叱咤一時嘅閻武(黎耀祥飾)淪為低端殺手,而造就「Zero」喬星(陳豪飾)成為全行最top嘅殺手。之後,因為「殺手獵人」嘅出現,佢哋被迫進行生死對決。劇集開播以來都取得唔錯嘅收視同口碑,首播周收視就已經打破3年嘅紀錄,全劇平均收視30.1點;大結局嘅最高收視率達到35.2點。

《殺手》劇照
《殺手》劇照

最高收視第2位:《機場特警》
警匪劇一向都係無綫嘅收視保證劇種,而以香港機場特警組做主題嘅《機場特警》就冇令無綫失望,成為今年無綫第二高收視劇集。有指劇集原定上年暑假檔期播出,不過因修訂《逃犯條例》一事,警民關係變得緊張,而抽起至今年播放。劇集由張振朗、蔡思貝、楊明、湯洛雯、黃子恆、朱敏瀚、黎振燁及鄧佩儀等人主演,講述佢哋由學堂受訓,去到成為機場特警後嘅生涯。全劇平均收視33.2點;大結局嘅最高收視率達到36.3點。

《機場特警》劇照
《機場特警》劇照

最高收視第1位:《法證先鋒IV》
《法證先鋒》系列第一至三輯都好評如潮,唔少人更認為係經典神劇。雖然今輯冇咗Tim Sir(歐陽震華飾)及Pro Sir(黎耀祥飾),成個感覺硬係爭咁啲,不過全新演員班底配搭新鮮,加上唔少重量級嘅老戲骨客串助陣,依然令唔少觀眾期待。以科學鑑證為題材嘅《法證先鋒IV》,講述「滅罪鐵三角」高Sir(黃浩然飾)、Dr. Man(李施嬅飾)及King Sir(譚俊彥飾)攜手合作,透過法證科學及執法精神去披露罪惡真相,將兇徒繩之於法。全劇平均收視36.3點;結局周平均收視更有38.8點,打破近七年嚟最高收視劇集紀錄。

《法證先鋒IV》劇照
《法證先鋒IV》劇照

最低收視第3位:《C9特工》
淨係睇個名就知道係以師奶特工為題材嘅《C9特工》,由高海寧、馬國明及黎諾懿等人主演,劇情主要講述特工C9余小嬌(高海寧飾)所隸屬嘅特工組織分部無故爆炸,佢自此就同總部失聯。之後,小嬌就引退並下嫁賣菜佬高大勁(馬國明飾),成為一個不折不扣嘅師奶。點知昔日拍檔B3馬雷斯(黎諾懿飾)突然出現,仲要求佢幫手搵出殲滅組織嘅元兇,自此佢過著師奶及特工嘅雙重身份生活。劇集出街後,唔少網民認為劇集出現唔少「膠位」、製作兒戲及劇情老土又沉悶等等。全劇平均收視20.8點;大結局22.6點。

《C9特工》劇照
《C9特工》劇照

最低收視第2位:《丫鬟大聯盟》
由湯洛雯、黃心穎、洪永城及謝東閔等人主演嘅古裝喜劇《丫鬟大聯盟》被安排喺炮灰檔期播出,劇情主要講述以裘府丫鬟月盈(黃心穎飾)為首嘅丫鬟聯盟,佢哋互通消息兼齊齊搵錢。另外,月皎(湯洛雯飾)為咗籌錢俾愛郎傅有為(謝東閔飾)上京赴考,不惜賣身為婢。月盈同月皎因各為其主,所以經常互相鬥法。雖然劇情輕輕鬆鬆又多靚女,不過受到黃心穎嘅「安心事件」影響,唔少網民都話罷睇呢套劇。劇集未能承接《多功能老婆》嘅氣勢,全劇平均收視20.4點;大結局22.4點。

《丫鬟大聯盟》劇照
《丫鬟大聯盟》劇照

最低收視第1位:《錦繡南歌》
由李沁及秦昊主演嘅古裝劇《錦繡南歌》講述自小被訓練成殺手嘅沈驪歌(李沁飾)與監政劉義康(秦昊 飾)暗生情愫,喺經歷重重難關後終於可以喺埋一齊,佢哋仲攜手保衛國家及開創盛世昌榮。劇集喺內地出街時評價已經一般,再加上無綫播映時內地已經播放完畢,結果劇集真係離唔開低收視嘅命運,全劇平均收視19.8點;結局周平均收視更有21.3點,成為2020年最低收視劇集。

《錦繡南歌》劇照
《錦繡南歌》劇照

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!