因政治表態出事？ 林秀怡告別主持6年《樂勢力》

就近月《反修例》風波問題，唔少市民都有自己嘅意見及想法，仲會喺社交網站上發表意見。其實唔少藝人都有喺社交網站上高調表達政治立場，而其中一位就係無綫藝人林秀怡（Kirby）。

林秀怡加入無綫10年，2009年參加無綫電視第23期藝員訓練班畢業後就正式加入無綫，一直都係參與劇集及做主持工作。不過喺噚日(16日)，佢就喺Instagram貼上與另一位主持音樂節目《樂勢力》歌手謝文欣嘅合照，更打上字句：「Bye bye la」。一個貼文，更令人懷疑因為Kirby就近日《反修例》風波事件而發聲，所以連主持飯碗都不保。

Kirby有時候都會於個人Instagram發表心聲，會鼓勵大家登記做選民、開黑天窗等，令大家都清楚佢嘅政治方向。早前於7月時，其實Kirby曾經於Instagram貼文：「我是有點衝動，不過....有天我在想，是不是要這麼忌諱？如果一個行業或者一個藝人，連自己少少思想都不可以表達呢？」有記者訪問Kirby時，佢都直認因此而被減少工作安排，但仍然十分期盼有得繼續拍劇。而Kirby今次貼上同歌手謝文欣嘅合照，亦有傳媒追訪佢想了解係咪已經「被離職，不被續約」。Kirby就表示唔捨得做咗多達六年音樂節目《樂勢力》不過知道係公司嘅安排要調配其他藝人做主持，所以亦會尊重公司。

近日已經有林子博、鄭敬基及林泳淘等疑因政治表態而遭無綫提前解約。至於講到未來工作安排，Kirby其實都擔心，因為自己早前太衝動發聲而影響工作，所以只好聽天由命，一切隨緣咁等待公司安排工作。