直播靈接觸｜Beyond前成員劉志遠嘉利大廈錄音遇火災 梁思浩大爆有「小朋友」助逃生

由「鬼王」梁思浩、黃紫恩（Jojo）及黃耀英主持嘅TVB Plus（82台）開台重頭戲《直播靈接觸》係一個互動靈異資訊綜藝直播節目，每集節目將邀請各門各派玄學大師與觀眾互動解答靈異疑難，觀眾除咗可以Phone-in與主持人互動，亦可即時喺社交平台留言參與，反應熱烈。前晚（7日）播出一集，邀請到香港歷史學家施志明擔任嘉賓大談香港都市傳聞，包括1996年佐敦嘉利大廈五級火及1998年發生嘅五屍命案。

香港史上最嚴重嘅高樓大火為1996年發生嘅嘉利大廈火災，當時火勢達五級火，逾百人被困大廈，有被困人士爬窗逃生因體力不支跌落5樓平台，又有被困人士於窗邊呼救期間被身後烈火吞噬。火警共焚燒達21小時，最終造成41死80傷嘅悲劇，多名死者遺體被燒焦，只可以用DNA辨識身份，火災震撼全港。《直播靈接觸》提到一名香港天后級女歌手事後喺一次電台訪問中提到，火災發生前幾日如常到嘉利大廈唱片公司，當時升降機並無停喺公司樓層，而係停喺公司嘅上一層，升降機門打開後見到一片漆黑牆壁。而原來唔少出入該幢大廈嘅人都表示火災前數天皆有相似嘅經歷。

梁思浩亦提到Beyond前成員劉志遠係當年火災生環者，指劉志遠當時身處於嘉利大廈嘅錄音室錄音，完全聽唔到外面嘅聲音，但就喺彈結他期間多次聽到一把小朋友聲音猛叫佢「走喇」，令佢成功逃生。梁思浩更表示：「當劉志遠同控制室職員逃生時，一直覺得嗰個細路仔『陪』住一齊走，更一路畀指示。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！