因表態得罪內地網民 傳李佳芯田蕊妮被無綫雪藏

反修例風波持續已經超過2個月，唔少藝人都有喺社交網站表明立場及抒發個人感受，當中包括「視后」李佳芯（Ali）及田蕊妮（阿田）。雖然佢哋得到唔少香港網民支持，不過就惹來內地網民不滿，除咗留言攻擊兼鬧爆佢哋之外，甚至揚言罷睇佢哋嘅劇集。最近更傳出Ali同阿田被無綫雪藏及被無綫官方微博封殺嘅消息。

上年憑劇集《BB來了》榮升「視后」嘅Ali，6月中喺微博兩度貼文抒發一下個人情感。之後，佢仲喺IG提醒大家記得登記做選民。不過就引起內地網民不滿，甚至要求無綫封殺佢及撤回支付平台嘅代言人資格。事後Ali已經發文否認支持「港獨」，不過內地網民好似唔係好受，最近仲傳出佢被無綫雪藏及已經暫停所有內地嘅工作，而佢有份主演嘅《殺手》亦要延期播出。拍攝緊新劇《愛美麗狂想曲》嘅Ali就繼續做好自己嘅工作，早前更傳出Ali冇份拍攝《BB來了2》及《踩過界2》，Ali就坦言藝人係好被動，所以會尊重公司嘅決定，而黎諾懿就解釋話因為撞咗期，所以《BB來了2》會延至下年2月先開拍。

另外，同樣係「視后」嘅阿田，因為早前喺社交網站出PO，疑似暗寸特首林鄭記招「無限Loop」，所以同樣引起內地網民不滿，仲話佢係支持示威者，要封殺佢，話明要罷睇佢套新劇《她她她的少女時代》。而佢套新劇就真係冇喺無線嘅官方微博做宣傳，不過喺香港嘅宣傳工作就繼續，阿田喺上星期嘅活動中，佢就否認被雪藏，仲同Ali嘅合法一樣咁話藝人好被動，所以會尊重公司嘅商業決定。暫時未有新劇開嘅阿田，嚟緊會轉戰樂壇，將會喺今個月20號舉行演唱會。