「地獄黑仔王」張振朗終於有劇播 《包青天再起風雲》將接《好日子》出街

早前無綫舉行「TVB Amazing Summer記者會」，派出逾60名藝員為夏日新節目宣傳造勢，當時更安排咗由鄭則士、苑瓊丹、黎諾懿及黃智雯等人主演嘅小品劇集《街坊財爺》緊接《好日子》播出。最新有消息指因節目調動嘅關係抽起《街坊財爺》，改播由譚俊彥、胡定欣、姚子羚、曹永廉及張振朗主演嘅《包青天再起風雲》，原本唔少網民都擔心姚子羚捲入桃色糾紛，令到劇集播映無期，而家可以鬆一口氣啦！

有消息指無綫內部曾經考慮播《牛下女高音》，所以早前先會宣布劇集唔會重拍同埋好快會播出嘅消息。不過經過一輪考慮後，無綫最終決定唔播，改播《包青天再起風雲》喺7月22日緊接《好日子》播出。以「包青天」為題材嘅古裝懸疑查案劇《包青天再起風雲》喺上年已經完成拍攝，劇集嘅包拯角色搵嚟「舊版包青天」狄龍之子譚俊彥飾演，而展昭及公孫策就分別由張振朗及曹永廉飾演，劇集除咗講述包拯屢破奇案之外，更會揭發遼國覬覦大宋嘅陰謀。

其實自從4月爆出「安心偷食」事件後，張振朗被黃心穎無辜拖累，連佢做男一嘅兩套劇集《堅離地愛堅離地》及《牛下女高音》都因為事件而播映無期。另外，早前有消息指張振朗有份演出嘅警察題材劇《機場特警》計劃喺暑假檔期出街，不過近日警民關係緊張，無綫高層認為現時唔係好適宜播出以警察為題材嘅劇集，所以就決定抽起唔播住。張振朗亦因劇集一次又一次被抽起，被網民封為「地獄黑仔王」。