「地道」星期五影院: 《喜劇之王》

周星馳嘅戲睇完又睇，睇極唔厭，呢期見到「霞姨」拍廣告，就不得不提《喜劇之王》！

唔經唔覺套戲已經係19年前嘅賀歲片，周星馳飾演嘅尹天仇熱愛演戲但連茄喱啡都撈唔掂，無對白嘅角色都被人彈鐘，飯盒都攞唔到個！無戲可演就教人做戲，因此遇上舞女柳飄飄（張栢芝 飾），教佢演繹初戀感覺時反而戀上對方，期間佢仲得到巨星杜文娟（莫文蔚 飾）嘅賞識，提攜佢做男主角。可惜命運弄人，尹天仇最後都做唔成男主角，繼續茄喱啡生涯。

《喜劇之王》其實一啲都唔喜劇，反而現實到令人神傷。尹天仇敬業樂業又會自我勉勵，理應受到重視或得到更好發展，偏偏當你係小人物時，你嘅睇法、意見會變成霞姨口中「我都唔知你做咩」，或者係「阻住人收工」同「浪費左好多工作人員嘅心血同時間」。尹天仇表達左做人要堅持但又被輕視嘅無奈，所以當同樣生活不順嘅柳飄飄肯定同支持佢嘅演技，2個寂寞的心互相得到慰藉，做人多左勇氣，世界又變得無咁可怕。

當時嘅張栢芝有幾靚，就不用在此重覆啦，當時以新演員身份參演《喜劇之王》表現亳不遜色，被人賦予厚望，將會成為香港另一位演技巨星。多年以後，張栢芝外貌同演技依然存在，不過一路走來被花邊新聞模糊左演員之路，戲如現實，事事不似如期。電影入面熟口熟面嘅演員仲有飾演導演嘅李思捷、陀地大哥林子善，2位當時參加「喜劇之王訓練班」而入行，都經過多年努力先成為叫得出名嘅演員。

一套好戲需要好多人配合，包括台前幕後，「做茄喱啡都係演員」，對於努力嘅人應該多啲尊重少啲恥笑。「霞姨」志不在演藝界，不過就係做得呢份工就要交足貨，先會有一個「專業演出」嘅代名詞「霞姨」出現。

by the way，「霞姨」真身叫B Lee，而家係一位塔羅占卜師，並唔係特約演員領班。