雅虎香港新聞 「地道」星期五影院: 《富貴再逼人》
呢幾年香港再次興起「移民」話題，睇完施政報告後，更多人討論與其儲錢買樓不如儲錢移民。其實香港早於80年代尾90年代頭都有過移民潮，仲有唔少電影都以移民做題材，今日介紹1988年嘅賀歲喜劇《富貴再逼人》都講左唔少移居加拿大嘅生活！
《富貴再逼人》係《富貴逼人》系列嘅第2部，俾返少少背景資料大家先。第一集故事講述雷達驃一家5口，驃叔（董驃 飾）驃嫂（沈殿霞 飾）同三個女帶弟（陳奕詩 飾）、來弟（李麗珍 飾）、招弟（關佩琳 飾）住喺沙田屋邨，中左六合彩頭獎1900萬但又無左嘅故事。去到第2集《富貴再逼人》，驃叔轉左做報社，點知被老闆以為佢手執痛腳而以「全家移民」做掩口費，不知就裡嘅驃叔仲以為執到好籌，點知到左溫哥華只係7個月，又再次被老闆打回原形，屋又無錢又無仲多左個仔添！
不過做得賀歲片一定大團圓收場，話說驃叔驃嫂同招弟返左香港之後，發現中左加拿大六合彩頭獎，多得一班舊街坊幫忙夾錢，佢地再次返回加拿大領巨額獎金！我相信大家都好想中六合彩頭獎，用份獎金嚟買自由、屋企、時間同空間！因為好似驃叔一家初到加拿大，覺得咩都好大︰間屋好大、間超市好大、個地方好大，為左睇套戲要坐幾個鐘頭車同無架車就邊度都去唔到。呢啲空間過大問題，喺香港都真係唔會搵到，除非你好有錢，如果唔係幾時都要逼車逼地鐵同住得好細！
《富貴再逼人》仲講左唔少現實，最慘係30年過後睇返依然到肉。例如片中老闆講嘅「有錢有辨法 無錢基本法」，而家聽返真係幾諷刺。
仲有唔少講左當時香港人對未來嘅睇法，例如拜年過後驃叔驃嫂坐地鐵就道出唔少神預言：
「香港就嚟俾啲異族人佔領哂，唔知幾時先會還我河山」
講開內地同胞，就有以下對白︰
「睇唔起我地香港人，第日由佢地管治，唔怪得之人人都移民」
返工呢？同事問驃叔點做，驃叔就話︰
「依家係請示年代，咩都要請示」
最到肉一定係驃叔一家登機果幕嗰幾句：
「恭喜你入咗外國籍，再唔係中國人。本來作為一個中國人，我唔應該恭喜你；但係作為中國人，我又好羨慕你」
「我地呢代香港人最悲哀，有家歸不得」
當然仲預言左用熨斗set頭呢個技巧，足足早過霆鋒30年！
最驚世係呢套戲由高志森執導及編劇，《富貴再逼人》滲出唔少睇淡前途嘅看法，而佢自己1995年都全家移民美國，不過因為《我和春天有個約會》受歡迎而回流。依家成為愛國（中國喎，唔係美國）人士嘅佢，仲講過1998年已經撕爛埋本美國護照！
