大仔涉藏毒被捕 成奎安逝世14年家事多 25歲孫仔撞車亡 細佬墳墓遭破壞

警方星期三喺西貢南圍村一個村屋單位撿獲1公斤大麻，並拘捕一名男子。據知被捕嘅係已故藝人成奎安同元配所生嘅大仔、南圍村村長成旭文。人稱「大傻」嘅成奎安係西貢南圍村土生土長原居民，曾經係該村村代表。2003年更加參選區議會，同建制派代表對壘，但不敵落敗。大傻2009年離世後，家中卻發生過唔少事，令人感到惋惜。

成奎安可以話係八九十年代港產片惡人代表，憑《監獄風雲》「大傻」一角而廣為人認識。成名前嘅大傻本來係幕後人員，做過臨記、攝影助手、龍虎武師等，80年代中期被電影人李修賢相中參與幕前演出。《監》一片當年大熱，成奎安與同片嘅何家駒、黃光亮及另一位有江湖背景嘅李兆基，被稱為「影壇4大惡人」。成名後成奎安片約不斷，高峰期一年參演近20套戲，亦曾經拍過TVB劇《900重案追凶》、《創世紀II之天地有情》、《金裝四大才子》等。2004年成奎安確診患上鼻咽癌，接受化療同電療後痊癒。不過根據當時報導，大傻自言係家中收入支柱，治病花咗大部份積蓄。大傻康復後忙於北上登台拍戲，疏於打理健康，結果再被驗出患上肝癌。2009年8月底，成奎安於香港浸會醫院病逝，終年54歲。

成奎安的弟弟成福安同為演員，兩兄弟不幸同於2009年因癌病逝世。而今年4月初，TVB節目《東張西望》曾報道，一名自稱黃小姐嘅市民，喺西貢竹角拜祭已故丈夫成福安時，發現墳墓被毀，更懷疑骸骨不翼而飛。黃小姐聲稱同成家人有錢銀及物業業權糾紛。而成旭文當時就指，將成福安骸骨掘起係圍村習俗，更指黃小姐已改嫁而聯絡唔到，又話對方唔守承諾交出物業。

「大傻」生前熱愛賽車，參加過澳門大賽車同港京拉力賽，但佢離世12年後，孫仔卻因車禍喺西貢英年早逝，令不少人感到唏噓。2021年底，西貢科大迴旋處發生嚴重車禍，一輛私家車失事剷上花槽，25歲姓成男司機傷重死亡。經傳媒查證，死者係成奎安嘅孫仔、成旭文嘅兒子成俊賢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！