【大個仔】童星Jacky仔大學畢業啦！

可愛又精靈嘅童星Jacky仔（王樹熹）相信大家一定仲記得佢！唔經唔覺原來佢已經22歲，今年仲喺城大媒體與傳播系畢業，準備開展佢新一頁，真係大個仔啦！最近Jacky仔於社交網站上載畢業照，網民們都紛紛留言恭喜佢。

2003年當時只有4歲嘅Jacky仔參加港台節目《點蟲蟲 開開心心學飛》後開展童星生涯，之後更接拍不少經典電視劇，例如《皆大歡喜》、《隨時候命》、《翻新大少》、《爸爸閉翳》等等，同過好多大明星合作，扮演過不少劇集內的童年角色，可以話係家傳戶曉。可惜因為Jacky仔升中後要專注學業，停止一切幕前演出，當時Jacky仔接受訪問話，兒時拍劇只為興趣，收入唔多。直至上年喺《她她她的少女時代》先驚喜現身，飾演曹永廉少年版。

另外，Jacky仔哥哥王秉熹（Jeffrey）同樣係童星，最令人印象深處刻嘅一定係飾演《十兄弟》當中的大喊十。兩兄弟感情深厚，去年浸大電影系嘅哥哥畢業，Jacky仔都有到場見證祝賀。

現在輪到Jacky仔城大畢業後，出路多元化，未知佢畢業後會唔會繼續拍劇，同哥哥兄弟檔拍住上，繼而進軍演藝界呢？相信大家可以期待一下。