大叔的愛︳成功追到簡慕華 邱士縉＠MIRROR點解叫大表哥？

ViuTV劇《大叔的愛》進入結局周，飾演阿田（呂爵安）同阿牧（盧瀚霆）嘅「食家」同事邱士縉（Stanley）追求梓芊（徐㴓喬）失敗後，轉而對KK（黃德斌）前妻Francesca（簡慕華）產生感情，今晚第12集仲會講到佢地開始發展！

《大叔的愛》令Edan 同Anson Lo人氣更勁，亦令較少人留意嘅Stanley開始受注目。同期播放嘅台劇《第三佈局塵沙惑》都有Stanley嘅演出，可以話係2線劇都有佢份！

Stanley雖然希望成為演員，但係本來佢係跳舞出身，大學時代參加舞蹈學會之後決定全職跳舞。佢同其他MIRROR成員都係參加《全民造星》被睇中，比賽中最經典一幕係被評判蕭定一盛讚「最記得就係Stanley嘅胸肌！」。

加入MIRROR後，由於Stanley經常被粉絲見到佢照顧比佢年輕嘅姜濤，覺得好似表哥照顧表弟，於是粉絲就叫Stanley做「大表哥」。而Stanley亦經常自稱係馬鞍山巨龍，同隊友Jeremy拍片嘅Channel都係叫「巨龍與豬仔」。

經理人花姐喺《調教你MIRROR》提到，由於佢眼中嘅Stanley性格成熟亦冇咩問題，花姐又無時間照顧晒MIRROR＋ERROR 16個人，所以花姐自言忽視咗Stanley，而Stanley喺台灣拍完《第三佈局塵沙惑》之後又未有更多發展，所以擔心自己前途。

不過花姐都盛讚Stanley心地好好，Stanley女友Alina（李炘頤）亦講過大表哥一件「暖男事蹟」。Alina參加《全民造星3》嘅時候忙於排練，期間同Stanley講起想食銅鑼灣某店嘅蘋果批，Stanley於是由馬鞍山出發過海買蘋果批，再送去荃灣西站附近嘅排練室，好貼心！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！