大叔的愛｜陳子豐為AnsonLo離婚 現實係愛妻號好爸爸 仲同余文樂係親戚

ViuTV劇集《大叔的愛》自播出以嚟好評不斷，成功掀起新一輪嘅追劇熱潮。除咗擔正嘅MIRROR成員Edan（呂爵安）、Anson Lo（盧瀚霆）及黃德斌成為焦點之外，飾演阿牧前男友周​政文（Darren）嘅陳子豐（Colin）亦備受關注。

陳子豐喺《大叔的愛》中飾演地產公司主任兼阿牧嘅前男友Darren，早前劇情就講到佢Darren同老婆離咗婚，佢喺囝囝移民前同佢合力打咗一場羽毛球賽，囝囝成功圓夢，場面相當感人。去到最新嘅預告，Darren終於出手喇！佢為咗阿牧去跪阿田，仲話：「如果你冇真心諗住要同佢一齊嘅話，麻煩你唔好再俾假希望佢。求下你，你俾返阿牧我呀！」唔少網民都話佢做得好好，紛紛留言支持佢，例如「你做得好好呀 果然有演技實力！」、「呢個角色你handle得幾好」、「好好戲」及「你做得好好啊!!!」等等。

陳子豐喺05年於演藝學院畢業，之後就開始參與舞台劇演出。10年因為杜之克而加入NowTV，之後佢開始做節目主持及參與拍劇工作，例如《撳錢》、《SE7EN》、《太平紋身店》、《無限斜棟有限公司》、《暖男爸爸》及《大叔的愛》等等。雖然佢喺《大叔的愛》為咗阿牧而離婚，不過喺現實生活中係愛妻號兼好爸爸，喺2016年佢與拍拖8年嘅圈外女友Joyce結婚，婚後誕下一子，一家三口幸福美滿。另外，陳子豐其實仲係余文樂嘅表哥，喺童年嘅時候佢哋關係密切，每個星期都會見面。余文樂仲勸過佢唔好加入娛樂圈，因為做呢行實在太辛苦，但陳子豐冇放棄，選擇堅持信念。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！