大爆當年減薪離巢原因 阮德鏘：今日嘅安穩生活 全靠當日的一個決定

粵劇名伶阮兆輝及尹飛燕兒子阮德鏘（Johnson），自細就跟隨父母喺戲行打滾。2001年加入無綫後，佢主要擔任司儀及拍劇工作，當中包括人氣劇集《大唐雙龍傳》、《烈火雄心》及《流金歲月》等等。不過之後喺2004年離巢，佢選擇北上發展，仲去咗北京拜中國京劇院殿堂級演員胡學禮為師。返回香港後，佢喺圈內嘗試唔同範疇嘅工作，例如拍電影、演出本地舞台劇、電台節目主持及粵劇演出等等，真係百足咁多爪。

近日有傳媒報道阮德鏘大爆當年離開無綫嘅原因，雖然佢當年唔算紅，但都有唔少工作，每個月有6萬蚊收入左右，可以有唔錯生活。不過可惜因為高層變動嘅關係，無綫進行改革。本來喺續約時，無綫同阮德鏘講要加薪50元，但後來又話要共渡難艱。之後，Johnson再問真啲原來佢改做一年只有一個演出合約，即係一年只有千幾蚊人工。經考慮過後，佢決定唔續約離開。

除此之外，Johnson亦話無綫同做戲曲係完全兩回事，因為戲曲係會有人帶住你，而做電視就相反，喺訓練班畢業後開始做茄喱啡，頭三月由羅冠蘭教導，之後三個月實習期，半年之後就靠自己。

報道出街後，阮德鏘都有喺社交網站留言回應話：「今日嘅安穩生活，全靠當日的一個決定，人最緊要係唔好後悔，做任何一個決定都係自己話事，慘嘅時候唔好自卑。好嘅時候唔好睇唔起人。。。」唔少網民都有叫佢加油，紛紛留言話：「加油」、「Add oil Support you」、「加油，努力，在K1OO都有捧你場李世民。風雨過後，總會有陽光在照耀你，我們永遠支持你。」及「命運在自己手，成敗得失在於自己的努力，你的奮鬥史可作年青人借鏡！」等等。