奇妙電視改名兼改台徽 新名「香港開電視」被網民笑爆
![image](https://s.yimg.com/ny/api/res/1.2/2WssC4T8Q3fT7IC9M620dQ--/YXBwaWQ9aGlnaGxhbmRlcjt3PTk2MDtoPTk2MA--/https://s.yimg.com/uu/api/res/1.2/80ZJEV.mkKmrUBO1wyXFIg--~B/aD02MjA7dz02MjA7YXBwaWQ9eXRhY2h5b24-/https://78.media.tumblr.com/b7eff54274f9fb106d5b306a95264e28/tumblr_inline_pf4uvxbm561u03abq_1280.jpg)
自從政府發放免費電視牌照之後,Viutv就成功開台,唔少節目都成功引起話題,不過另一個電視台「奇妙電視」就似乎冇咩聲氣啦。
「奇妙電視」開台一年多,一齣有話題嘅作品都冇,又冇宣傳。不過冇計啦,冇人做嘢丫嘛。去到而家,為奇妙電視提供節目製作嘅有線電視已經兩度裁員、就連娛樂新聞組全組炒咗12人只剩1人。啱啱今個月又裁咗 on air promotion (形象宣傳)、體育組、工程部同行政部逾30名員工。佢哋之後更加會將啲節目外判,今年底將會有進一步裁員行動。搞成咁,高層當然要諗個辦法救命啦!唔知係咪搵過算命佬求助呢?暫時未見到佢哋有改變公司嘅政策,不過就諗住先改個台名同改台徽!
有消息就指奇妙電視將改名為「香港開電視」Open TV,好明顯就係想叫大家開電視睇啦。不過如果大家用國語嚟講嘅為,「開」字嘅發音就會變咗「kai」,「kai」嘅意思就係無聊、好笑啦!除此之外個「開」字諧音更加同粗口相似,肯定會網民笑爆。
而新台徽方面,佢哋就搵出面廣告公司專人設計,並將會喺下個月11日大型發布會交代改革大計。奇妙電視外事部回應改名嘅時候就話:「集團未來將有不同業務發展,希望大眾繼續留意集團最新發展動向。香港開電視係其中一個選擇,我哋仲有幾個名㨂緊。」
其實佢哋並唔需要叫觀眾開電視,因為而家嘅問題並唔係觀眾唔睇電視,而係唔開佢哋個台嚟睇。所以如果佢哋要改名,不如改做「轉台啦」!