《女人俱樂部》深夜重播中 7位少女版演員發展大不同 有人角逐視后／榮升人母／消失於樂壇...

無綫2014年重頭劇《女人俱樂部》（M Club）邀請多位昔日女神出山拍劇，仲搵嚟七位新人女演員飾演佢哋嘅少女時期角色，包括陳瀅、賴慰玲、王敏奕、黃山怡（糖妹）、陳嘉寶、吳嘉熙及吳燕菁，佢哋瞬間人氣急升。劇集最近喺深夜時段重播，而家就同大家睇下呢班新演員嘅最新發展啦！

陳瀅
現年31歲嘅「宅男女神」陳瀅（Jeannie）係模特兒出身，當年喺劇中飾演容丹丹（陳慧珊飾）少女版，因樣子甜美加上演技不俗，除咗得到網民愛戴之外，佢亦係無綫近年力捧上位小花之一。極速上位嘅Jeannie，大部分劇集嘅戲份都唔少，例如《四個女仔三個BAR》Brittany、《全職沒女》繆思及《平安谷之詭谷傳說》邱青蘭等等，佢今年成功憑《黄金有罪》水敏婷一角角逐《萬千星輝頒獎典禮2020》最佳女主角及最受歡迎電視女角色。至於感情方面，出道至今緋聞多多嘅佢，最近盛傳同何猷亨復合。

賴慰玲
現年34歲嘅賴慰玲（Winki）於演藝學院畢業後，成為舞台劇演員及電台節目主持人。2013年由舞台劇殺入電視圈，當年佢係經老師推薦參演《女人俱樂部》，喺劇中飾演許珍妮（張慧儀飾）少女版，劇集出街後更被前輩黃秋生大讚佢好戲，更被封「小鄭裕玲」。之後佢喺無綫都參演過唔少劇集拍攝，例如《殭》、《棟仁的時光》、《降魔的》及《機場特警》等等。今年佢喺《反黑路人甲》中飾演霸氣又強悍嘅「大小姐」蔣千霞，成功將角色發揮得淋漓盡致，人氣急升。至於感情方面，賴慰玲喺2017年同拍拖多年嘅舞台劇演員梁子峰結婚，並於同年誕下囝囝，一家三口生活愉快。

王敏奕
現年28歲嘅王敏奕（Venus），14歲開始做模特兒賺錢養家，直至2008年參加電影《烈日當空》試鏡獲得取錄後開始佢嘅演藝事業。2014年更開始拍劇，於《女人俱樂部》中飾演朱莉（李麗珍飾）少女版，成為唔少男士心目中嘅女神。近年主力喺電視圈發展嘅王敏奕，喺正在熱播中嘅《香港愛情故事》飾演我行我素嘅攝影師Shay，演技獲得觀眾認同。其實除咗參與無綫劇集拍攝，佢之前亦有參與邵氏《飛虎之潛行極戰》及ViuTV《假設性無罪》等等。而今年Venus更加盟星夢做歌手，向歌影視三棲藝人進發。至於感情方面，佢上年下嫁曾國祥，升呢做索爆人妻。

黃山怡（糖妹）
黃山怡（糖妹）於2008年以組合糖兄妹出道，除咗發展歌唱事業，佢亦拍過唔少電影及劇集，例如電影《人約離婚後》、《我的筍盤男友》及於《女人俱樂部》中飾演肥菜（葉蘊儀飾）少女版等等。雖然呢兩年大家唔多喺電視機見到佢，不過佢所參演嘅無綫劇集《香港愛情故事》及《陀槍師姐2020》已經陸續出街啦！至於感情方面，自7年前與舊愛何浩文分手後，糖妹直言一直單身至今。

陳嘉寶
現年30歲嘅陳嘉寶（Anjaylia）係模特兒出身，當年因拍攝財務公司廣告而漸為人熟悉。佢憑《女人俱樂部》飾演巫小詩（李若彤飾）少女版成功入屋，之後亦有出演《殭》及《跨世代》。佢喺2017年下嫁拍拖四年嘅初戀男友黃頌祈，並誕下兩名囡囡，現時已經減少幕前演出。雖然佢已為人母，不過佢身材完全冇走樣，依然充滿少女味。

吳嘉熙
女子組合Super Girls成員之一嘅吳嘉熙（Cheronna），喺《女人俱樂部》中飾演「小吱喳」陸婉秋（袁潔瑩飾）少女版，之後只係拍過ViuTV《Plan B》及香港電台《手語隨想曲6》。主力做歌手嘅佢，今年與余香凝舉行網上音樂會。不過佢最為人熟悉嘅應該係佢曾與夏雨兒子黃奕晨（Dixon）高調拍拖，可惜上年宣布分手。

吳燕菁
吳燕菁（Annice）係來自廣州嘅孖妹組合A2A（前名AOA）成員，喺《女人俱樂部》中飾演羅鳳仙（江欣燕飾）少女版，Annice係多咗人識，不過之後發展平平，甚少參與劇集拍攝。雖然佢專注發展音樂事業，不過人氣一直冇起色，現時已消失於樂壇中。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！