女朋友唔可以知嘅WhatsApp群組

成日都話拍拖要甜蜜，要幸福，今日同大家講，其實通通都唔需要。

女朋友話：「梗係啦，因為你懶，只係識得hea我。」

呢個時候你大可以抱住佢講，hea，都係一種浪漫。

唔通日日好似韓劇咁生離死別，天意弄人咩？人哋男女主角久別重逢，深情一吻，我哋最多咪係遲到Sorry，深水埗地鐵站上電梯嗰陣錫一啖。

我以為女朋友會一巴打埋嚟話我冇情趣，結果有個意想唔到嘅反應⋯⋯

女朋友都明白，愛情的確被電影、劇集，同埋啲冇人識嘅細作者（例如啲咩莎比亞）描述得太美好，睇壞人個腦。佢平時話想「如果你都係咁就好喇⋯⋯」其實只係呻下，憧憬一下，我哋有我哋嘅浪漫方式。

佢好清楚，亦唔係真係埋怨。

而其實愛情最浪漫之處，唔係啲咩窩心小舉動，反而係個「蠢」字。

每一日，你都會做啲估佢唔到嘅蠢事引人發笑。又落錯車、又唔記得帶銀包，又較錯鬧鐘唔知醒。而佢冇好好安慰你，仲笑得好大聲話抵死，愈笑愈大聲，但你竟然冇嬲，因為聽日到你笑返佢。

喺對方面前，你毫無保留地展示最蠢一面，因為你知道，佢並唔介意。

除咗大頭蝦嘅事，生活中仲會有一啲真係失敗到你唔想見任何人，只係想暱埋一邊嘅灰心moment。但就算你失望到盡頭，都有一個人，明知你有幾唔掂，都會撐住你，同你講：「最多咪一齊努力過囉，你點都仲有我。」

問題依然係你自己解決，佢其實幫唔到你，只係言語上嘅安慰，但你知道，有佢嘅支持，你可以重新嚟過，佢都依然喺你後面。

有人支持自己，突然間，你發現自己有力撐落去。

激情嘅幸福、戲劇性嘅浪漫、生離死別嘅不離不棄，現實中有一成已經係滿分。淡淡然嘅一日，鬧市中緊握對方，一齊經歷過嘅大小事，捱過嘅困境，只有你哋兩個先知道。一個明白嘅眼神，一個安慰嘅擁抱，一個高高低低依然愛你嘅輕吻，再唔需要更多。

FB: 莎比亞