好Pure好True 娛樂圈5位傻大姐

近日中國游泳選手傅園慧，接受訪問時表情鬼馬，可愛率真嘅性格迅速走紅。佢知道自己竟然紅咗，仲話大家係咪太重口味，佢真係太可愛太令人鍾意啦～其實娛樂圈都有好多女星出名傻傻更更，勝在夠真，所以勁多人鍾意佢哋，一齊睇吓5位新一代娛樂圈傻大姐：

麥美恩－香港

麥美恩（Mayanne）港姐出身，自從主持資訊節目《學是學非》，同一班事非精越嚟越熟之後，傻大姐真性情都顯露出嚟。節目入面成日嘻嘻哈哈，成日展現毫無儀態可言嘅超級爽朗笑聲，但係咁樣反而反映到佢活潑嘅性格，得到唔少觀眾歡心。再加上Mayanne表情夠哂鬼馬，做下把位又無所謂，就算扮吓醜扮吓騎呢， 唔知點解都覺得佢好可愛，可能因為佢夠真啦，抵佢人氣急升啦！

宋智孝－韓國

叫得做「懵智」，宋智孝梗係韓國傻大姐嘅代表之一。作為韓國綜藝節目《Running Man》嘅唯一女主持，從來唔需要成員或者男嘉賓讓賽，每次都不顧形象咁盡力完成任務，更加成為Running Man入面嘅王牌Ace。不過智孝有時又會唔覺意流露傻傻哋嘅可愛一面，成日唔覺意瞓著咗，甚至試過喺七米高嘅積木台上面都訓得著，有時又會無啦啦發呆傻笑，被光洙挑釁吓又會忍唔住化身為不良智孝，又唔介意素顏出鏡。所以智孝率直自然不造作嘅傻大姐表現，不論男女都被吸引為Fans呢～

綾瀨遙－日本

綾瀨遙憑劇集《螢之光》乾物女角色爆紅，但原來樣又靚身材又正嘅佢，私底下都係一個傻大姐。綾瀨遙試過睇完電影《ET》，真係喺打風嗰陣學主角踩單車想飛上天，又話過自己最想變成恐龍周圍飛。同佢拍過劇嘅演員都忍唔住話佢傻，好似岡田將生話綾瀨遙每日嚟到片場只係掛住午餐食咩，仲懷疑佢到底係咪未食飽，成個大胃王咁。又踢爆佢平衡感勁差，坐個旋轉椅都可以失平衡。綾瀨遙仲試過錄完節目，行去休息室嗰陣一路行一路除褲，玉木宏咁岩係後面，搞到玉木宏鬼死咁尷尬，原來綾瀨遙當時唔知後面有人。不過就係因為佢靚得嚟又有傻大姐嘅性格，反差感極大令佢連續三年成為日本最理想女友第一名呢～

北川景子－日本

睇落好似好cool咁，點知原來北川景子真人傻傻地不知幾親切。其實北川景子明明係靚女，但成日唔介意喺劇集入面整醜自己，表情誇張鬼馬，好似喺劇集《抹布女孩》扮演嘅角色會聽到死者講嘢，每次都驚到變「囧」樣，因為而得到「囧子」嘅外號。鏡頭外雖然外表望落好高冷，但意外地北川景子有男仔頭嘅直率性格，好似之前上節目宣傳，主持人叫佢介紹吓套電影，點知佢傻傻地一口氣爆哂啲劇情，之後又曬自己胳肋底，再大爆自己只沖20秒涼。然後又話自己未試過浸露天溫泉，怕有枯葉跌落嚟要再洗過，又話驚有雀仔會飛嚟，古怪搞笑嘅理由連主持人都忍唔住笑佢。

白歆惠－台灣

作為台灣名模，螢幕上總係高貴美麗嘅形象，點知私底下反而係個糊裡糊塗嘅傻大姐。試過拍拍吓戲，坐喺張凳到都可以無啦啦自己向下滑，差啲飛出去，又畀導演笑佢傻大姐，表情好鬼卡通。而佢懷孕初期都完全無發覺自己有咗，仲走去騎馬、打拳、甚至去美國高空跳傘，後尾拍戲仲著高跟鞋跑步。直到有咗3個幾月終於有啲唔舒服，走去Body Check先發現自己有咗，初頭佢仲以為因為拍戲捱間抵夜太攰先咁，真係符合佢傻大姐性格～

圖片來源：傅園慧微博、tvb.com、麥美恩Facebook、韓國綜藝節目《Running Man》、宋智孝微博、《螢之光：羅馬嫁期》電影劇照、劇集《抹布女孩》、日本清談節目《閒聊007》、北川景子Instagram、白歆惠Facebook