雅虎香港新聞 【妻疑誤墮投資騙局】麥長青身價少咗三分一 每星期500蚊零用錢維持家人生活
前無綫藝人麥長青（麥包）老婆，喺6年前同朋友炒賣iPhone而誤墮投資騙局，除咗被騙逾400萬元之外，同時亦受到滋擾。有傳媒指，曾有兩名「凶神惡煞」貌似黑社會嘅男人，去無綫搵麥包「追數」，搞到佢形象受損，無綫將佢雪藏，令佢演出機會大減，後來佢無奈離開無綫。麥包喺無綫默默耕耘多年，終憑《巾幗梟雄之義海豪情》角色梁非凡勇奪「最佳男配角」，之後更成功做到男二角色，又有份主持《街坊遊樂團》，有一定嘅人氣。呢件事對佢嘅影響好大，為咗生存佢擔任綜藝節目《Do姐有問題》做嘉賓，只得$500利是做酬勞。離開無綫後，早前麥包就去咗ViuTV拍攝處境劇《娛樂風雲》，同埋與金剛合作嘅旅遊節目《C9旅行團》。
有指麥包本來喺九龍灣有間茶餐廳，但都頂唔住而執笠，而澳門嗰間仲頂到，另外佢上年又同朋友再接再厲喺觀塘開餐廳。報道指，麥包慳自己唔慳家人，收入全數交老婆管理，為咗家人生活不受影響，麥包現時仍住喺清水灣豪宅月租八萬，老婆每星期會俾$500零用錢佢。好彩麥包間唔中有返內地登台賺錢，暫時生活唔成問題。
麥包估唔到呢件事令佢身價少咗三分一，不過佢認為一家人齊齊整整已經好開心。
