姊弟戀高調定低調都一樣開花結果

姊弟戀以前就話無咩人接受，所以就算拍拖都要低調啲，等到結婚先放膽放閃。之但係張倫碩同鍾麗緹呢對姊弟戀就極度高調，張倫碩甚至帶埋鍾麗緹女兒考拉去參加國內真人親子秀《爸爸去哪兒》第四季，當初不被人睇好嘅姊弟戀情，似乎真係完全開花結果咁。宜家姊弟戀無論低調定高調，都一樣可以成功架：

高調成功例子
張倫碩&鍾麗緹（差12年）

下星期二（8號）46歲嘅鍾麗緹終於會嫁畀34歲嘅張倫碩，相差12年嘅佢哋因為拍真人秀《如果愛》擦出愛花火，但係起初個個都唔睇好，皆因除咗年紀問題，鍾麗緹仲已經結過兩次婚有3個女。不過，你有你唔睇好，佢哋有佢哋繼續高調恩愛，佢哋嘅婚照一輯接一輯，真係閃到無朋友。張倫碩同鍾麗緹3個女勁好關係，同埋細女考拉一齊參加親子真人秀《爸爸去哪兒4》完全無難度，細心嘅張倫碩不知幾錫佢，被人讚好爸爸。其實參加埋真人秀，都係想得到鍾麗緹囡囡嘅認同，張倫碩仲喺節目入面不時表達對鍾麗緹嘅愛意，呢個真係成熟穩重嘅好男人～唔怪得姊弟戀都無問題啦～

低調成功例子
羅仲謙＆楊怡（差5年）

36歲楊怡同31歲羅仲謙呢對姊弟戀應該無人唔知啦？羅仲謙有涉嫌打前女友傅穎嘅負面新聞，所以傳出同楊怡拍拖嘅時候大家都只關心會唔會重蹈覆轍。不過，同楊怡緋聞傳咗好耐佢哋都唔肯承認，甚至之後有疑似車震（雲吞麵事件），大隻謙仲緋聞多多好似仲未定性咁。正當以為佢哋無哂聲氣應該分咗手，轉個頭今年年頭就喺微博公開已經喺英國註冊結婚，近排喺香港補辦婚禮大隻謙仲扮公仔氹楊怡添。低調姊弟戀終完開花結果，羅仲謙都由暴力男換上專一深情好男人形象，個個都只會記得佢IG只follow楊怡一個啦～

疑似成功皇室例子（差3年）

英國哈里王子不嬲有花花公子形象，性感後生靚女女伴一個接一個。不過唔知係咪因為見到呀哥有個幸福美滿家庭，哈里王子近年似乎想修心養性。近日就傳出32歲嘅哈里王子同35歲嘅美國演員Meghan Markle蜜運中，仲同爸爸王儲查理斯介紹女友，好似好認真咁。雖然呢個傳聞仲未證實，但雙方都未有證實戀情，亦都未有否認，而Meghan仲喺Instagram post咗張兩條香蕉緊抱入睡嘅相，真係搞到呢單嘢似層層咁。如果係真嘅話，連英國皇室都接受姊弟戀，各位姊妹就可以勇往直前啦？

圖片來源：鍾麗緹@微博、楊怡@微博、羅仲謙＠Instagram、Meghan Markle＠Instagram、Meghan Markle＠Twitter、Wikipedia