媽媽自小教導禮多人不怪 曾守明難登男一願當「金牌綠葉」

【星島日報報道】無線資深藝員曾守明昨日傳出死訊，在廣州演出時突然暈倒舞台，搶救無效去世，終年58歲。曾守明人品佳，生前廣交好友，不少網民、圈中朋友亦為他的死訊感到惋惜。在一段無線訪問片段中，曾守明道出媽媽自小教導他以「禮多人不怪」為做人宗旨，令人明白他人緣好的原因。曾守明分享：「我媽咪一向好支持我嘅工作，最緊要我鍾意、做得到，搵到食就得。媽咪連自己名都唔識寫，但佢教曉我三句說話，去到邊都受用，『多謝、對唔住、唔該』夠㗎啦。人哋踩到你，同佢講聲對唔住又如何，冇問題㗎。人哋有恩惠畀你，講聲多謝、唔該，好簡單。就算大家幾唔啱傾，講早晨就行開，唔需要有衝突。」 入行多年，鍾愛演戲的曾守明講到入行經過是基於「貪慕虛榮」，不喜愛坐定定的寫字樓工，更瞞住老細去拍廣告，遇到藝員訓練班接受報名，曾守明決意參加。在演藝路上成為「金牌綠葉」的他道出：「當然有理想（做主角），但知道自己發展路線唔係咁，所以行其他路，可能係性格啲。」 回憶初入行拍《新紮師兄1988》，曾守明感激同劇的老前輩鮑方叔，二人感情進展為契爺、契仔的父子情。他說：「嗰時我覺得慘啦，遇到兩位老前輩會唔會好難應付呢？就係金雷叔同鮑方叔，佢兩個係江湖大佬，我演鮑方叔司機兼保鑣。有一場戲鮑方叔要逃走，佢預備咗錢叫我唔好再跟佢，段父子情好感人。拍到中後期，我同鮑方叔好似父子咁，係佢契仔。」 在無線面書專頁看過訪問片，網民紛紛留言表示不捨，多位網民為曾守明打上一篇《心經》，亦有人望曾守明安息，「離苦得樂，一路好走」、「感恩多謝你拍攝給我們看」、「願曾守明一路好走，佢嘅家人節哀順變」、「雖是綠葉，你用心地給我們帶來那麼多好戲，謝謝你。」

睇更多