雅虎香港新聞 【宅男女神封盤】鄺潔楹被指與富二代男友拍拖半年
又一宅男女神封盤啦！今日有報道指「仙氣女神」鄺潔楹（Judy）與年約30歲經營酒吧嘅富二代男友Ricky Yung拍拖半年，佢哋仲已經發展到半同居關係添呀！
貴為女神嘅鄺潔楹，裙下之臣當然唔會少，所以佢揀得嘅男朋友條件一定唔會差。據講Ricky家境不俗，擁有多部名車，其中一部更加價值四百萬。最近Ricky喺尖沙咀開設酒吧，鄺潔楹唔知係唔係驚有靚女埋佢身，所以佢經常喺酒吧打躉，實行宣示主權呢？！鄺潔楹已經唔止一次被傳媒拍攝到去男友酒吧，好似上星期鄺潔楹與JW等人出席完活動後就前往酒吧消遣，玩到凌晨4點先走人，之後，鄺潔楹、Ricky及一名友人落樓等車，期間鄺潔楹行路東歪西倒、用手同手袋打友人，睇嚟Judy都飲咗唔少！雖然有醉意，不過佢都好識撒嬌，除咗用眼電之外，佢仲攬實男友，之後Ricky就輕撫女友背脊，最後佢哋齊齊返Judy位於大埔嘅屋企。
現年28歲嘅鄺潔楹，喺美國大學畢業後，返香港曾任職業務分析師，不過佢就覺得工作太沉悶，一啲都唔適合，所以一年後就加入模特兒公司做Model。2016年開始加入無綫，主要擔任娛樂新聞台主播，其後憑處境劇《愛·回家之開心速遞》飾演校園女神Venus、主持《3日2夜》及《學是學非》人氣急升，深得網民愛戴，更封佢為「仙氣女神」。除咗參與劇集及綜藝節目拍攝之外，Judy仲係廣告客戶嘅新寵兒，係無綫力捧上位小花之一。事業發展不俗嘅佢，家境亦非常唔錯，父母係家具商人，家住大埔二千呎獨立屋，仲同阿哥合資購入跑馬地逾千萬元嘅單位。至於感情方面，鄺潔楹前後拍過四次拖，每次都至少維持一年，但女神都有遇過渣男！喺接受電台節目《公子會》訪問時，佢就話初戀男友出軌，仲愛上自己嘅好姊妹，分手後佢喺街重遇佢並問佢分手原因，點知膚淺嘅對方竟然話佢身材唔夠第三者好，胸部唔夠大。呢番說話令Judy喊咗好耐，仲搞到Judy有少少抑鬱。
