安樂戰場︳唐麗球澄清余倩雯被姦戲「假戲真做」傳聞 強調「曾志偉導演專業嘅」

曾志偉三十多年前執導兼主演嘅電影《安樂戰場》，多年來一直有傳女演員余倩雯喺片中一場強暴戲被要求「打真軍」，令佢情緒崩潰。近年內地社交平台亦不時討論呢件事，而同片另一名「慘遭蹂躪」嘅前港姐唐麗球，日前出席活動時再被問起當年拍攝情況。

唐麗球受訪時話余倩雯被姦戲份拍攝時冇大家講到咁嚴重，現場只得導演同攝影師。唐麗球重申情況「冇咁嚴重」，又認為女演員事後情緒激動好正常，而片中負責施暴嘅菲律賓男演員都喊住行出現場，因為唐麗球知道對方係天主教徒，可能接受唔到要對女性施暴。唐麗球憶述當時有去安慰余倩雯，余好快就入咗房休息，唐麗球相信余「接受咗」，並強調相關戲份中各人都係專業嘅，亦再次否認「假戲真做」嘅傳聞。

《安樂戰場》入面除咗余倩雯受辱，唐麗球都被菲律賓男演員摸胸。唐麗球直言做足安全措施，「成隻碗擺落去咁滯」，再次強調對手掂唔到自己，對方都好有道德。

1990年上映嘅《安樂戰場》以「曾志偉第一套主題嚴肅的作品」做賣點，講述一個香港旅行團到菲律賓觀光，點知遇上當地政變而成為恐怖份子嘅人質，被拘禁期間遭遇悽慘，最終團友反抗逃出生天。演員有溫碧霞、唐麗球、黃光亮、余倩雯及鄧碧雲等。

當年電影到菲律賓實地拍攝，亦搵到當地特約演員參與。戲中有2場強暴戲，多年來一直有傳演員兼導演嘅曾志偉要求「打真軍」，後來曾接受訪問交代箇中情況。佢話其中一場強暴戲，本來只係想簡單交代，安排受害嘅女演員衣衫襤褸咁出現就算，但係女演員話全套戲得呢一幕做主角，建議拍得逼真啲。於是志偉同負責施暴嘅特約演員及女演員夾好，底線係雙方重要部位冇接觸就得，而且拍完會同女演員睇返呢場戲，如果尺度太大就銷毀呢場戲。曾志偉又叫女演員有事就要大叫救命。

到拍攝嗰陣曾志偉安排清場，現場只有導演同攝影師。曾志偉憶述roll機冇耐，女演員就大叫，志偉以為只係演緊戲冇理會，後來其他人發覺唔妥，甚至有人爆粗先知「出事」。當時曾志偉見到女美術指導攬住喊緊嘅女演員，志偉就俾人鬧「唔係人」。到底係咪有人「假戲真做」？曾志偉喺訪問度冇表明。事後團隊氣氛相當差，曾志偉甚至話喺菲律賓拍完《安樂戰場》後同全部人反晒面咁返香港，並指呢場強暴戲拍出嚟嘅畫面效果太差，最終冇用到。

而喺《安樂戰場》戲中被強暴嘅余倩雯，多年前接受另一份雜誌訪問，憶述當年拍《安樂戰場》嘅強姦戲時，被6呎高菲律賓演員撞向枱角受傷，返香港要做鼻骨移植手術，事後覺得為幾萬蚊片酬而賣命唔值得。之後余倩雯轉去TVB拍電視劇，但係被人嫌佢「老牛聲」，於是轉做幕後，做過陳慧嫻保姆同形像指導，再同後來嘅老公開唱片公司。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！