宣傳公司被爆訛稱同MIRROR合作 連林作都中招 老細之一係新城有米DJ凌志灝

近日有廣告公司發文，表示佢地早前同男團MIRROR合作嘅日本護膚品廣告，被另一間無份參與嘅市場推廣公司挪用盧瀚霆(Anson Lo)、姜濤、陳卓賢(Ian)及呂爵安(Edan)出席活動嘅宣傳照片，並聲稱廣告片及宣傳活動由佢地負責。廣告公司透過律師向市場推廣公司發信要求解釋，又指「幾經周旋，Edmond Ling 最終透過他的代表律師與我們達成和解，簽署了道歉書並支付了一些律師費給我們」。呢度提及嘅Edmond Ling係涉及事件嘅市場推廣公司負責人之一，後來被網民揭出原來係新城DJ凌志灝。

事件揭發後，唔少網民聲稱曾經幫襯凌志灝嘅市場推廣公司，結果一單生意都做唔成，於是成立「苦主群組」。有人發現早前因失言而被保險公司辭退嘅林作，亦被同呢間市場推廣公司扯上關係。網民向林作求證，並指林作以語音短訊回覆，聲帶裡面嘅「林作」強調「同佢哋並無任何合作，只有見過面」，亦冇同凌志灝嘅市場推廣公司進行任何廣告宣傳，更加嬲到爆粗話對方想「搵我老襯」。

同范振鋒等人喺新城主持節目《Bili Bala 開大喇叭》嘅凌志灝Edmond，曾經接受youtube頻道訪問，仲公開自己租住嘅豪宅大屋同埋靚跑車。Edmond 曾經自爆本來家境富裕，但小學時家道中落兼父母離婚，甚至要住劏房，而佢自己就試過誤入歧途，到後來見到阿媽捱病先至生性，更獲得北京大學EMBA學位同全球傑青名銜。凌志灝做DJ以外仲有唔少副業，開市場推廣公司同創辦教育機構之外，又為上市醫療集團出任業務發展總監。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！