家族榮耀︳隱形億萬富婆 李彩華6段情史 同內地前夫婚姻唔夠2年玩完

TVB劇《家族榮耀》入面飾演三少奶嘅李彩華(Rain），戲中經常著名牌出入，原來唔少係私伙，計落隨時過百萬！劇情安排佢嫁入豪門，現實中Rain都曾經同內地商人黃彥書結婚，但係唔夠2年就因為聚少離多而分開。不過早年北上發展順利嘅Rain本身就係豪門！密密拍劇搵銀再買樓，而家手揸估計近億物業，唔駛靠男人。以前同過幾位才俊一齊，可能或多或少學識投資，叻女呀吓。

林峰

呢段真係唔提都唔記得，畢竟都20年前！2001年林峯同李彩華拍電影《別戀》而撻著，據講係Rain嘅初戀。事隔多年李彩華受訪先講起，林峯拍戲時對佢十分體貼，知道佢受傷仲好擔心，冇幾耐就拍拖。Rain形容呢段戀情係puppy love，仲承認見過喺內地有頭有面嘅林峯家人，大讚林家對佢好友善。後來林峯返內地發展，戀情維持半年左右不了了之。

蕭定一

人稱「燒山」嘅蕭若元，大仔蕭定一2003年開拍劇集《功夫足球》，被傳狂追卡士之一嘅Rain，甚至有傳媒影到佢哋上的士激咀。蕭定一同Rain一齊嘅時候，Rain家人生意失敗要還債，蕭定一幫手租屋避債主之餘，仲發功等Rain由黃柏高旗下轉會全力「跑數」，但係拍拖4年最終都係分手。

王傲山

2008年Rain被傳同保險業才俊王傲山（Marcus）拍拖，2年後王打電話同身在內地拍劇嘅Rain提出分手。佢地拍拖期間新聞多多。有傳王傲山買樓被Rain一家人住，但Rain否認仲話有交租，據聞有人好不滿被過橋。王傲山後來同有線主播劉明軒撻著，極速結婚亦都極速離婚，記者搵Rain回應，佢都話「咁快？」。

潘啟翀

王傲山之後，Rain同又係才俊嘅潘啟翀(Derek）交往，佢地一齊落蘭桂坊夜蒲被影到拖住手入場。做汽車零件生意嘅潘啟翀同時又係金融界人士，不過據傳因為男方向女友借錢不果，竟然成為分手理由。

何遠恆

90年代TVB力捧古天樂、古巨基、劉愷威、吳家樂同埋何遠恆做「新五虎」，前三位唔駛多介紹啦，吳家樂依然喺TVB，何遠恆冇做幕前多年，反而喺2015年因為同李彩華拍拖而「重返」娛樂版。何遠恆同李彩華因為朋友介紹而認識，拍拖前後3年，感情穩定加上雙方都有事業基礎，一直有傳會修成正果，但因為對結婚冇共識，難行就無謂再拖，一於斬纜。

黃彥書

有傳Rain想同何遠恆結婚，但對方無表示又無計劃。之後Rain同內地鋼鐵業商人黃彥書(Eric）撻著，半年後喺2019年情人節宣布結婚，仲話會補辦婚宴。但係後來爆發新冠疫情，Rain同Eric長時間未能見面，最終喺2020年11月Rain向外界承認離婚。Rain表示過兩夫妻之間「發生咗啲事」，而Eric亦曾被人貼街招追數。雖然Eric身家豐厚，但Rain並無申領贍養費。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！