雅虎香港新聞 《寶貝計劃》Matthew BB大個仔啦！15歲近照曝光被指似普通人
2006年電影《寶貝計劃》由成龍及古天樂主演，戲中嘅Matthew BB（Matthew Medvedev飾）憑住可愛萌樣及一對水汪汪嘅眼睛，深得大家喜愛，至今都留下深刻印象。電影日前喺無綫翻播，相信唔少觀眾依然俾佢個cute cute樣融化。電影唔經唔覺已經上映15周年，即係話Matthew都已經15歲，而家就同大家睇下佢嘅最新近照啦！
電影中Matthew BB原名叫Matthew Medvedev（蔡志強），係一個混血寶寶，爸爸係中國人，媽媽係哥倫比亞人。當年只有3個月大嘅Matthew，同爸爸媽媽搭地鐵，期間剛巧遇上導演陳木勝。Matthew BB對住父母整出各種嘅古靈精怪樣及可愛鬼臉，就係呢點足以吸引陳木勝上前邀請佢父母帶佢去試鏡，最終Matthew喺千人當中脫穎而出。喺拍攝期間，Matthew深得演員及幕後人員喜愛，就連古天樂及成龍都經常同佢玩。《寶貝計劃》上映後票房大收，年紀輕輕嘅Matthew更獲提名第26屆金像獎「最佳新演員」，成為史上最年輕獲提名嘅演員，呢個紀錄至今仍未有人成功打破。
人氣急升嘅Matthew因為爸爸覺得佢年紀細，而且應該與一般小朋友一樣有開心童年，唔想佢從小就要加入演藝工作，所以之後就冇再接拍其他工作，絕跡幕前。大家再次見到Matthew就係喺2016年《第35屆金像獎頒獎典禮》上嘅亮相，當時10歲嘅Matthew以「長大的童星」身份上台，穿上西裝仍然不減可愛。
近日有Matthew嘅新相，佢真係大個仔啦！身高已經高過身旁嘅媽媽，雖然可愛水汪汪眼已消失，不過就散發出獨有個性。另外，亦有網民話唔認得佢，因為佢越大越普通，個樣同普通人冇分別。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
