尋味台灣 經典台式小菜見真章

講起台灣菜,不能不食牛肉麵。不過各家有家法,間間舖頭嘅牛肉麵都各有自家嘅特色,有濃有淡、有辣有甜。今日介紹嘅兩間台菜餐廳,都有唔同嘅煮法。一間以台灣配方、用上10幾種藥材同辣椒製作、一間以牛骨、藥材等熬煮湯底超過一日,當然另外都仲有其他台灣小菜啦~

木玥巷(元朗)

由前半島酒店廚房班底主理嘅台灣菜小店,食物質素然有保證。小店走簡約風,裝潢多以木系為主,感覺舒適自在。菜式嘅原材料同醬油,大都嚟自台灣,希望畀食客感受到最貼近台灣嘅味道,在記憶中旅行。

木玥招牌紅燒牛肉麵

食台灣嘢必食牛肉麵。呢個湯底以牛骨、藥材,再加煲牛肉嘅汁熬煮超過24個鐘,除咗有陣陣清香嘅牛肉味之外,仲帶有鮮甜。而牛肉亦以黑糖醬油煲過先再紅燒,肉香突出。呢碗麵抵食在於一碗入面有幾款唔同嘅牛肉部位,包括安格斯肥牛、牛𦟌同牛筋,全部嚟自美國嘅,軟腍入味。仲有條台灣炸豆干,浸湯索汁咁食更可增加整體口感。

桂花梨黑醋骨

一上枱已經聞到陣陣醋香,黑醋骨炸得香脆,甜度剛好,用嚟送飯係幾啱。不過就咁食黑醋骨,食多幾嚿可能會有啲膩,師傅特意選用桂花梨作配搭,酸甜清新,既可中和膩感,亦有助清清味蕾。

蟹肉金絲炒新竹米粉

一碟簡單嘅炒米粉,足以見到師傅功架。選料方面,新竹米粉較一般米粉堅硬,炒起上嚟亦會乾身啲。師傅仲以蛋黃撈勻米粉先再炒,令到每條米粉炒至金黃色,同時多咗份蛋香。最開心係好足料,蟹肉、瑤柱、葱花、西芹、絲芽菜等,由頭到尾都可以食到,幾乎啖啖都有蟹肉。平時炒粉麵最怕多油,嚟到唔使擔心,炒完都唔會太多油呢。

鹽酥炸春雞

鹽酥雞又係另一樣必食嘅台灣菜,呢度仲要原隻上,好吸引。大約800-900克嘅雞,先以蒜蓉同醬油醃過,再上台灣地瓜粉,以高溫生炸,值得一讚係炸粉薄薄der,而且炸完都唔多油,做到外脆內嫩。想再惹味啲,就要點埋自家製嘅醬汁,分別有以青花椒同指天椒粉等調製嘅麻辣醬,同埋加入檸檬汁調校嘅鳳梨檸檬醬,前者麻香帶微辛,後者酸甜,好refreshing。

蒼蠅頭配刈包

台灣地道眷村菜,以韮菜花炒肉碎,再加埋豆豉,開胃惹味,既可以送飯,亦可以用新鮮軟熟嘅刈包夾住嚟食,口感豐富。


老媽拌麵
(北角)

台灣有唔少乾拌麵品牌,都好受香港人歡迎,以前去旅行要幾pack幾pack咁買返嚟,其中呢間乾拌麵更開設埋門巿,供應自家古法手工精製嘅關廟麵同台式小食等。佢哋喺香港有幾間分店,北角呢間就係最大最靚嘅,仲可以望到埋北角碼頭嘅海景。

地獄麻辣牛肉拌麵

呢個可以話係餐廳嘅招牌菜,如果第一次到訪嘅話,唔使諗,試咗佢先。地獄麻辣汁由台灣直送,用咗大約15、16種藥材同辣椒製作,可以想像得到麻辣嘅程度有幾高。麵質Q彈索汁,麻比辣感強,特別係凌厲嘅後勁,愈食愈麻,食完一段時間都仲有餘韻留低。不過值得一讚嘅係呢個拌麵濃味得嚟唔會太鹹,而且仲可以免費加底。

老鍋麵

老鍋麵個湯底唔簡單,用上牛骨、蔬菜、牛肉、甘草、花椒、八角等約13種食材同藥材熬足8個鐘而成,味道辛辣得嚟又有啲甜甜地。餸料豐富,有肥牛、響鈴等,墨汁豬肉丸同鴨血更係由台灣直送,後者好滑身,索晒湯汁好入味。

花雕雞拌麵

鍾意酒香嘅朋友仔,好容易就會畀呢碗麵吸引住。師傅特地選用3年以上嘅花雕酒釀雞,酒香味會突出啲,雞肉嫩滑。而呢款麵底就相對清少少,主要靠醉雞同醬油嘅甜味做引。

香麻豬手飯

豬手軟腍而外皮彈牙,係炆咗2個鐘嘅成果。個汁都好惹味,麻香中帶有微甜同藥膳嘅微甘,食完成個嘴都keep住麻㗎好過癮。師傅參考台灣嘅配方,用咗 10幾種藥材去調校呢 。

3色地瓜球

呢幾款炸波波係人手工製作,炸得幾脆身,質感又夠煙韌Q彈,幾好嚼口。紅色嗰隻係朱古力餡、黃色係花生醬餡,紫色則係芝士餡。3款以紅QQ嘅甜度最高,紫QQ則較淡。

心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異