尋找家香情︳葉問外籍徒孫Nima King 老婆張茆曾激吻倪震全城鬧爆

TVB節目《尋找家香情》搵一班喺香港生活嘅外國人分享感受，尋晚播出嘅一集，受訪者係來自澳洲嘅詠春學校創辦人Nima King。喺伊朗出生嘅Nima，家人因為戰亂而移居到澳洲，自小迷上詠春，因機緣巧合下遇上到澳洲悉尼宣揚詠春文化的葉問入室弟子徐尚田師傅，因而被他的功架及詠春博大精深的學問深深吸引。Nima毅然跟徐師傅到香港學習詠春，後來更排除萬難，成功建立全港最大詠春學校之一。

Nima喺香港建立事業之外仲成家立室，佢提到太太係內地網紅，翻查資料原來大有來頭。Nima 太太就係曾經因為激吻倪震而登上C1頭條嘅張茆。

2008年，有傳媒影到同周慧敏拍拖多年嘅倪震，喺中環同年輕女子咀嘴，報導一出全城轟動。後來追查到呢位女主角係由內地到香港城市大學做交換生嘅張茆，當年只有21歲但已經一啜成名，被全城鬧爆嘅張茆立即潛水，兼且搵律師出聲明話會日後專心學業，對事情作出反思。

同樣被千夫所指嘅倪震，一度以「孔雀開屏」為偷食自辯，並且宣佈同周慧敏「引咎分手」。但係一個禮拜後二人又戲劇性地宣佈結婚，完全估唔到。倪震婚後修心養性，不過上年又被人影到同後生女行街。

至於張茆，事件平息後返香港繼續學業，留港生活期間認識到Nima，佢地2013年結婚，第2年大仔出世，2017年誕下細女，一家四口住豪宅，張茆照顧仔女之外仲做埋育兒KOL，閒時出post宣傳產品，一個翻身晉身人生勝利組。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！