幫襯小店：新鮮出爐熱辣辣

下午5時經過九龍城豪華餅店，細細的門面聚滿人龍。 蛋撻新鮮出爐，震騰騰香噴噴，客人睇見總忍不住幫趁，一盤三十幾個轉眼賣光，難怪蛋撻來到客人手上，永遠新鮮熱辣。 酥皮鬆化，蛋奶濃滑。眾所周知他們用料靚，秘訣是用「來佬」 忌廉加北京雞蛋，全盛期每日賣六、七十盤是等閒事！那時啟德機場未搬，好多人上機前都要來買打蛋撻，只因這味道，別處真的吃不到……

豪華做的是街坊生意。每日早上六點開門，十點收工。「以前收得仲夜呀，街坊夜晚肚餓想搵嘢食， 或者啲後生仔夜返要買定第日早餐，都有個地方。」 老師傅松哥13歲學師，做到現在83歲，而豪華一做就是40年。 紅磚牆配大玻璃櫃，老店風情，遠遠望見就認得。店面小，客人都要站在門外買包。椰絲卷、合桃包、忌廉包、三角朱古力蛋糕、紙包蛋糕，都是賣少見少的傳統味道，還有少甜葡撻、小提子包，迎合新一代。最難得是，四十幾種包點從早到晚都有麵包新鮮出爐，都是人手做，「人手做唔同㗎，食得出，好食好多。」的確！麵包鬆軟得來不是輕飄飄，不同連鎖麵包店都是工業式產製，靠化學劑發大，食落無麵粉香。後生都嫌辛苦，倒是幾十歲人愈做愈有勁，「以前無機器， 一大盤材料都係人手攪，都慣晒喇。」

都說老店人情味濃。豪華永遠為老主顧留了個位置，擺奶油蛋糕。新一代怕肥怕膩，但那濃厚的奶油香，卻是上一輩每逢生日喜慶， 象徵歡樂幸福的滋味。「有人鍾意食，我哋都繼續做。」門口寫着「牛油生日旦糕 」，白雪雪的奶油上放着鮮紅色的罐頭車厘子，實而不華。瑞士卷的內餡不用忌廉，也是正正式式的奶油。松哥靜雞雞透露：「出面淨係落植物牛油，我哋加埋鮮牛油，食落特別香滑。」

平日經過豪華望多眼，分分鐘會野生捕獲發哥，聽講發哥經常來豪華買蛋撻和老闆打牙骹。

立即 Follow「好集慣」 Facebook 每天發掘更多好習慣!