【年尾盤點】2019年香港娛圈大事回顧 你記得幾多？

今年仲有唔夠10日就完結，回望今年嘅娛樂圈發生咗好多大小事，當中有喜亦有悲，不如而家就同大家一齊回顧今年娛樂圈發生嘅大事啦！

如果要講今年最具話題性嘅娛樂圈事件，相信唔少人都會話係4月爆出嘅「安心事件」。男女主角許志安及黃心穎被爆出一段長達16分鐘的士車廂纏綿嘅片段，片段流出後立刻引起全城哄動，二人形象直插谷底。許志安隨即舉行記者會公開道歉，並宣布暫停手上嘅幕前工作，而黃心穎就同馬國明分手及避走美國8個月。事隔多個月後，鄭秀文（Sammi）似乎已經放低並原諒安仔，黃心穎喺本月中就高調返香港，佢所主演嘅無綫劇集亦陸續播出，唔知佢有冇機會翻身呢？

每年年尾都係樂壇派發成績表嘅時候，但今年因為近半年香港社會不穩嘅關係，香港電台嘅「十大中文金曲頒獎典禮」、新城電台嘅「新城勁爆頒獎禮」及商業電台嘅「叱咤樂壇流行榜頒獎典禮」喺早前已經相繼宣布取消，並改以其他形式頒發獎項。目前只係淨返無綫嘅「勁歌金曲頒獎典禮」，無綫方面就話《2019年度勁歌金曲頒獎典禮》暫定喺下年1月18日舉行。

無綫花旦姚子羚（Elaine）喺5月捲入桃色糾紛，被指與已婚花弗渣男Raymond Young拍拖兼疑似有床照流出。當時報道指Elaine與人夫Raymond喺上年8月開始拍拖，而男方一直有個中印混血兒太太蔡宛珊（Sarika），Sarika仲要同子羚本身係朋友關係。報道亦指Raymond同太太已經分開，仲辦理緊離婚手續。不過除咗Elaine之外，仲指Raymond另外仲有一位圈外人二奶，關係亂到不得之了。

反修例風波已經持續超過半年，有唔少藝人都喺社交網站表明自己立場及抒發個人感受，當中包括「視后」李佳芯（Ali）及田蕊妮（阿田）。Ali喺微博兩度貼文抒發一下個人情感及喺IG提醒大家記得登記做選民，而阿田就社交網站出PO疑似暗寸特首林鄭記招「無限Loop」，結果佢哋引起內地玻璃心網民不滿，仲話要求無綫封殺佢哋，之後就傳出被雪藏嘅消息。有指無綫除咗已經暫停Ali喺內地嘅所有工作之外，佢主演嘅劇集《殺手》被抽起延播、《BB來了2》及《踩過界2》就被換角，分別改由岑麗香和張曦雯頂上。至於阿田方面，無綫早前播出佢主演嘅劇集《她她她的少女時代》，不過喺無綫官方微博竟然罕有地零宣傳。雖然佢哋都有份入圍爭視后，不過唔少人都認為會影響佢哋嘅爭獎機會。

被網民譽為年度神劇嘅無綫劇集《金宵大廈》，由陳山聰及李施嬅主演，劇集播出後掀起追劇熱潮，深受觀眾歡迎。劇情主要講述金宵大廈看更阿蕭（陳山聰飾）及住客空姐Alex（李施嬅飾）嘅一段前世今生孽緣愛情，期間仲會講下大廈入面嘅一班住戶遇到唔同嘅怪事。除咗演員表現出色之外，劇情夠晒奇幻懸疑及撲朔迷離，有唔少情節仲令觀眾意想不到添呀！另外，劇集喺《萬千星輝頒獎典禮2019》獲得多項提名，其中包括「最佳男/女主角」、「最受歡迎男/女角色」及「最佳劇集」等等。

喺今年，娛樂圈雖然有好多喜事發生，不過都有多位資深藝人離世嘅傷感消息，當中包括「影圈四大惡人」李兆基於6月2日因肝癌擴散至肺部病逝、著名綠葉演員夏萍於8月5日病逝、資深甘草演員「上等人」梁舜燕於8月13日病逝及著名音樂人黎小田於12月2日病逝。

今年何家嘅喜事真係冇停過，先後有三房「最索千金」之稱嘅何超蓮被內地男神竇驍成功「私有化」、兒子何猷啟突然爆出已婚並為人父親。至於四房方面，何超盈與哈佛高材生辛奇隆（Thomas）結婚兼誕下囡囡「荷包蛋」，何猷君與內地名模奚夢瑤結婚兼誕下賭王首個男孫，真是可喜可賀呀！

反修例運動持續超過6個月，唔少藝人都有出席集會遊行或喺網上表達自己嘅意見。港台節目《視點31》喺11月5日邀請立場對立嘅杜汶澤及陳百祥討論香港局勢及民情。呢場「黃藍大戰」最高峰超過27萬人同時收看直播，期間佢哋各有論點，火花四濺，引來網民極大迴嚮。

喺7月中，任達華到中山出席活動時，一名身份不明嘅男子突然衝上台，拎出利刀刺傷任達華嘅右手掌及腹部，隨即送院接受治療。早前佢出席劇集嘅北京記者會，望落精神相當唔錯，右手嘅傷疤已經唔明顯，睇嚟佢嘅恢復狀況比預期好。

張致恆（Steven）喺7月嘅時候，突然喺社交網站宣布婚訊及已誕一子，原本呢個PO吸引唔少粉絲讚好，不過後來被揭發「一腳踏五船」，與多名女性關係糾纏不清，當中包括以為自己係正印嘅模特兼演員梁皓恩（April）。事件發生後，Steven形象雖然插水，不過未婚妻雯雯依然選擇同佢一齊。喺今年9月佢哋拉埋天窗，11月更宣布老婆再度懷孕。