延續豐收旺勢 利是加碼 譚俊彥林夏薇如虎添翼長做長有

·4 分鐘文章
譚俊彥與林夏薇攞獎後人氣當旺,工作無停手。
譚俊彥與林夏薇攞獎後人氣當旺,工作無停手。

應屆視帝譚俊彥(Shaun)與視后林夏薇(薇薇)牛年當旺,名利雙收,相信虎年繼續長做長有,好劇陸續來。薇薇自爆獲獎後翌日開工便被紅酒照頭淋,預告新一年「鴻運當頭」;大豐收的Shaun期待新年向同事大派利是時分享喜悅,2人豪氣表示今年會將利是加碼,實行開心Share!

譚俊彥與林夏薇首次入圍《萬千星輝頒獎典禮》五強便一擊即中登上視帝視后寶座,事業登頂。薇薇坦承牛年大豐收:「上年自己有兩個角色好鍾意,觀眾有共鳴,我隻狗狗(健康)又好番,依家又有多一個獎去鼓勵同肯定,所以對我嚟講係豐收年。」她自言獎項對她意義重大,但同時又像做了一場美夢:「攞完獎第二日開工,好似夢醒咗去返工咁,照常背對白。」她笑言開工時拍攝紅酒淋頭的場口,被工作人員指她新一年肯定鴻運當頭。

至於Shaun除了有獎,又有人氣韓劇《魷魚遊戲》加持兼成為廚房男神,更有機會到內地拍劇搵真銀,人氣一時無兩,他表示:「舊年好多貴人,我好幸運每次自己鑽牛角尖就會收到啲鼓勵說話,好神奇,衛世輝(綜藝監製)雖然走咗,但佢送咗份禮物畀我,就係節目《不可能任務》,拍完之後突然明白冇嘢係不可能,算係我少少嘅人生轉捩點,跨過自己舒適圈,例如喺台慶跳舞。」

提到新年,薇薇每年都會購買桃花及蘭花布置一番,廚神Shaun就會下廚炮製賀年菜式與家人分享,他說:「新年一定會飲雞湯,做蛋角同北方特色菜,例如烤夫同紅燒肉,所以每年新年都肥咗,係開心肥。」薇薇雖然廚藝未及Shaun,但勝在有個廚神老公,一樣有口福。談到最難忘的新年,薇薇謂小時候會放爆竹,十分熱鬧,Shaun則回想跟太太初拍拖時,到對方鄉下大連度歲,當地只有零下廿幾度,過了一個很特別的春節。至於今個新年2人都要在工作中度過,薇薇說:「我要拍劇,係開心事,因為有工開。」Shaun則已身在內地為新戲作準備。問到事業大豐收,利是會否加碼?2人異口同聲表示:「一定會!」

尋求突破 不忘初心

另外,2人奪獎後各有是非,薇薇對於奪視后惹網民爭議,她豁達地說:「作為一個演員一定有鍾意你或唔鍾意你嘅人,要睇自己點面對,我係好正能量嘅人,會接受唔同聲音,人係需要進步,有進步空間先可以成長。呢個獎對我嚟講唔係有咩好勁嘅成就,而係好開始,提醒我要做得更好。」她又感謝丈夫的支持與包容,以及感恩有老同學陳曉支持。

至於Shaun被指是靠爸爸狄龍,他反而覺得能在爸爸見證下獲獎別具意義:「有啲朋友得到一啲成就時,佢爸爸已經唔喺度,所以我唔想後悔,做咗人爸爸之後,明白到原來囝囝攞獎係好開心,所以我唔會理人點講,都要將呢份喜悅畀佢(爸爸)。」

對於新一年展望,薇薇希望所有人身體健康,自己工作上有突破:「想不停試新嘢,想腳踏實地行好每一步,做好眼前本分。(生小朋友呢?)未諗住,嚟緊工作排得幾滿。」Shaun表示新一年目標是不忘初心:「攞完獎第二日返舖頭,同自己講冇嘢改變,我仍然企喺度洗碗,最難能可貴係以前係咁,依家都係咁。想快啲拍劇,期待下一個角色同對手。」

場地:金玡居(山頂廣場)

林夏薇與譚俊彥祝大家虎年財運亨通。
林夏薇與譚俊彥祝大家虎年財運亨通。
譚俊彥期待新劇開拍。
譚俊彥期待新劇開拍。
林夏薇指攞視后對她是好開始。
林夏薇指攞視后對她是好開始。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能