張嘉兒床戲連場 搵老公實習

東方日報
·2 分鐘文章
已育有兩女的張嘉兒,是否追多個仍猶豫未決。
已育有兩女的張嘉兒,是否追多個仍猶豫未決。

人妻張嘉兒於新劇與前輩許紹雄演一對老夫少妻,內裏有不少搞笑床戲,絕對老少咸宜,她笑指老公翻閱劇本後不但沒有反對,還主動要求對戲,令其零壓力。而育有兩名女兒的她,表示曾想過追第3個,但因實在分身不暇,故暫時擱置計劃。

入行14年的前港姐張嘉兒,原來只拍過5、6套劇集,難怪自嘲新丁一名,她透露近年先後兩度產女,對上一部作品已是幾年前。

夫婦約法三章

最近嘉兒於無綫劇集《陀槍師姐2021》與許紹雄演夫妻,笑指配搭甚有新鮮感。由於沒有拍劇多時,再加上生完第2胎半年便埋位,起初也因記性差,未能一氣呵成唸對白,幸好獲許紹雄從旁鼓勵,兩場過後便把一切放鬆,她說:「好驚阻佢收工,好在佢冇畀壓力我,我愈做愈放。(有戲癮?)以前就冇,因為未識分析劇本,依家開始有,近幾套劇角色又幾好,自己做多好多工夫去準備,自然投入多咗。以前淨係識得緊張,齋背對白,心諗家庭第一,事業先係第二,依家會有啲豁出去心態,劇集出街想畀觀眾好印象。」

她現時與老公約法三章,當她開工日子便由男主內,沒料效果非常不錯,老公也沒有詐型,還主動幫手對戲:「劇本有床戲會叫我搵佢實習,佢冇話唔畀拍親熱戲,只要有需要都尊重嘅。」

嘉兒有4姊妹,知道多兄弟姊妹的好處,故曾有段時間很想追第3胎:「兄弟姊妹係父母畀佢哋最大嘅禮物,但後來發現兩個女需要我嘅時間愈來愈多,老公又鍾意二人世界,如果有埋第3個,更加冇時間陪佢,所以暫時又冇咁想住。」

唔擔心蔣家旻

由於照顧小朋友已霸佔不少時間,故嘉兒坦言與圈中朋友甚少時間見面,幸而科技發達,可以透過手機群組聯絡,對於一班姊妹中僅得蔣家旻尚未有着落,問到會否介紹男仔給她?嘉兒說:「唔擔心佢,佢有嘅,兩個人妻朱千雪同岑杏賢,我等緊好消息(懷孕)。」

張嘉兒拍劇數量不多,但正是貴精不貴多,更能好好發揮。
張嘉兒拍劇數量不多,但正是貴精不貴多,更能好好發揮。