張家輝做「軍師」特訓一年! 張振朗操到腎虧 發力搶視帝

張振朗希望以獎項紀錄這一年的辛苦特訓,將來再三回味。
張振朗希望以獎項紀錄這一年的辛苦特訓,將來再三回味。

無綫小生張振朗為台慶劇《拳王》盡地一煲豁出去,一年內喪操變成「筋肉人」,身材媲美憑電影《激戰》二度封金像影帝的爆肌張家輝!振朗亦自爆有參考對方演技,如今劇集獲好評,大有機會跟家輝一樣橫掃獎項,勇奪首個無綫視帝寶座!

張振朗從演10年來,參與過約半百部劇集作品,若要數最難忘必《拳王》莫屬,該劇播出至今,其表現大獲好評,尤其赤裸上身的操練片段渾身是「肌」,把角色完美演繹!日前振朗接受本報專訪,直言角色「海正藍」是入行以來最大突破︰「無論身形或角色上都未試過,觀眾覺得我成日嬉皮笑臉,對比年頭嘅《堅離地愛堅離地》演宅男,兩個角色有好大反差,海正藍係沉實、穩重同剛陽,希望大家睇到我可塑性幾高!」

為演活泰拳拳手,他秘密練兵一整年,谷出凹凸有致的「朱古力」,更大方晒令人充滿遐想的標準人魚線。成功操得一副結實Body,原來背後隱藏多位「軍師」,他說︰「之前睇過好多打拳戲,譬如張家輝、彭于晏、張繼聰,佢哋好Fit,將Standard推到好高,我惟有貼近少少。」

紀錄辛苦成果

他跟隨教練安排的體能訓練,每星期做6日Gym,加上每日規律食4至5餐烚蛋及飲用蛋白質粉,終煉成「魔鬼」身形!而前晚一集他在劇中操練,當中一幕凌空做Sit Up,令觀眾嘆為觀止!

當年張家輝演爆肌拳手,為他帶來第二個金像獎影帝,問現時「視帝」呼聲高企的振朗是否有信心得獎,雖然他日前謙稱入行10年「未夠班」,但受訪期間卻漏口風,表露其「野心」︰「如果真係有機會攞到嘅話,我想紀錄低呢個Period。要喺公司拍一套打拳嘅劇集,又有呢個身形,我覺得唔係一件容易嘅事,好辛苦,但過程好開心,係值得!好想紀錄低今次呢個突破,過咗十幾年望番轉頭都抵呀!」

日去50次廁所

成功需要付出代價,振朗為求達到更顯肌肉的「收乾水」狀態,開拍7日前便要做足準備,頭一日狂灌約9公升水,搞到不停去廁所,險被誤會腎虧,他笑說︰「之後就開始減飲水,除衫嗰日只可以濕吓個口。記得頭一日Keep住拍外景,好彩附近有廁所,差唔多去咗50次廁所,好誇張!都驚身邊人以為我腎虧,哈哈!」同劇拍檔姚子羚及蔡潔見證振朗的努力,出賣其睡相大讚︰「呢位拳王幾努力,攰到咁都攞住本劇本瞓着咗!」