張栢芝同兩個寶貝仔行街冧爆又拖又錫又攬

東方新地

更新日期： 2018年4月14日下午1:21

過完二月十四，又話要過白色情人節，過完西洋情人節，又嚟元宵佳節同七夕，年中咁多個情人節，邊慶祝得咁多個，有心愛的人陪伴左右，就日日都係情人節啦！所謂心愛的人，邊個話一定要係老公或者男朋友，好似張栢芝一樣，一得閒就拖住兩個寶貝仔Lucas同Quintus行吓街拍吓拖咪一樣sweet sweet！

撰文：東方新地│圖片：新傳媒圖片

張栢芝情人打孖上

早前又畀見到柏芝一拖二去咗又一城睇玩具，兩個仔高大咗、靚仔咗，仲好懂事，聽教聽話仲識幫輕媽媽攞吓袋。唔怪得之栢芝就算冇拖拍都有仔萬事足，一對仔輪住又拖又鍚又攬，有愛到一個點！

其實唔係吓吓都只得媽媽買玩具畀囝囝，早排二月十四，張栢芝就自爆喺屋企同兩個小情人食住家飯過節，Lucas仲話要送紮花畀媽咪添！不過柏芝話心領，自己唔鍾意花啫嘛！

一個湊兩個轉吓眼已經第七年，栢芝出街一拖二話咁易，Lucas被媽媽攬實時，Quintus就乖乖跟住行。年中梗會傳出幾段新緋聞，其實睇栢芝行兩步都要忘情錫吓攬吓Lucas，就知呢位媽咪有仔萬事足，都未必有心機應酬新戀情。

去到邊都出名親民有求必應，栢芝被粉絲要求合照時，仲好識做面貼面舉晒V。

好媽媽張栢芝攰爆陪囝囝去嘉年華

張栢芝計劃今年開戲做導演，近期已忙於籌備，早前公開招募新演員，最近又忙於搞自家服裝品牌生意，不過點忙都好，栢芝一定留大量時間畀兩個兒子。去年12月26日Boxing Day，栢芝帶兩個仔去中環「歐陸嘉年華」玩。

去中環嘉年華

當日傍晚約六時許，栢芝帶住Lucas及Quintus，約埋髮型師好友Marvin，到達中環「嘉年華」會場，甫入場就拖住兩個仔，急急腳迫排隊玩攤位遊戲，7歲細仔Quintus見到啲毛毛公仔已經非常雀躍，捉住栢芝玩拋呼拉圈遊戲，只見栢芝拖住Quintus，細心教他拋出呼拉圈落啲公仔度，不過兩兄弟一直掟唔中，為幫兒子贏公仔，栢芝就落力掟，好彩最終贏得兩隻戰利品。