張繼聰拍片認遭封殺：感激TVB對我嘅栽培

東方新地

更新日期： 2017年11月24日上午1:12

張繼聰近年參演無綫劇集一部接一部，形象亦相當入屋，深得觀眾喜愛，不過近日無綫因同蕭定一嘅公司因錢銀問題鬧官司，結果旗下藝人張繼聰被無綫封殺。起初蕭定一及張繼聰都否認傳聞，但紙包唔住火，張繼聰在周三晚拍短片親自交代被封殺一事，佢直認道：「將來有一段日子唔可以再喺嗰度出現喇，過去嘅日子好感激TVB對我嘅栽培，多謝珍姐(高層曾勵珍)。」並表示將來會繼續努力。

圖片來源：張繼聰Facebook ，新傳媒圖片庫

張繼聰被無綫封殺

近日有指2014年無綫仍是佘詩曼的經理人，同蕭定一公司簽約拍電影《十月初五的月光》。但有傳當時張智霖唔滿意劇本要改，搞到電影要逾期完成。無綫向蕭定一公司追回補水薪金，指佘詩曼應收過百萬的額外薪酬，但對方肯付一半，所以無綫用法律解決而且下令封殺蕭定一旗下藝人，包括張繼聰，所以日前《萬千星輝賀台慶》未見張繼聰的參與！張繼聰最初回應傳媒，指自己對封殺傳聞未有所聞，更表示會繼續參加《誇世代》的宣傳活動，又話：「我都好享受拍TVB劇！」暫時明年主力投放在電影上。

張繼聰：好多謝TVB嘅栽培

但及至晚上張繼聰在Facebook上載53秒短片，親自交代被封殺一事：「大家好！今日出咗單新聞之後，好多謝大家嘅支持，咁可能嚟緊有一段時間唔可以再喺將軍澳出現…有啲說話都想喺度交代。首先喺過去嘅日子好多謝TVB嘅栽培，畀咗好多機會我，好多謝珍姐(曾勵珍)。入面好多台前幕後嘅兄弟姊妹，好多謝你哋，俾咗好多美好回憶我。」雖然冇得出席無綫劇集《誇世代》嘅宣傳活動，不過佢都依然叫一班觀眾繼續支持：「至於現在呢……希望大家可以繼續支持《誇世代》啦，我都好enjoy睇每一集嘅。喺生活裏面，我覺得最緊要係隨遇而安，我會繼續努力㗎！Thank You。」

雖然暫時唔可以同一班電視觀眾見面，不過阿聰仍然稱讚及多謝無綫給予好多出鏡機會：「首先喺過去嘅日子好多謝TVB嘅栽培，畀咗好多機會我，好多謝珍姐。」除咗多謝無綫之外，阿聰亦話好多謝一班台前幕後嘅工作人員，畀咗佢好多美麗嘅回憶畀佢。

對於遭封殺，網民幾乎一面倒支持張繼聰，仲大鬧無綫小氣，張繼聰反叫大家唔好衝動，又不忘呼籲觀眾支持《誇世代》。

陳豪幫口：阿聰真是一個好藝人

張繼聰近年獲無綫力捧，熱播中的台慶劇《誇世代》也是男主角之一，但日前歐陽震華、陳豪、李佳芯、吳業坤、麥明詩等演員出席電視劇《誇世代》的校園宣傳活動，張繼聰因遭無綫封殺被禁出席活動，一眾演員都替阿聰感到可惜，陳豪明言：「因為阿聰真是一個好藝人，希望這一場公司之間的誤會可以盡快解決。」歐陽震華直指阿聰很陰功及無辜，對佢未能再參與宣傳感到很可惜。