張繼聰跑到想嘔 靠囡囡撐住

張繼聰成功完成賽事,個樣好攰咁喎!
張繼聰成功完成賽事,個樣好攰咁喎!

染了一頭白髮的張繼聰昨日處男下海參加渣馬半馬賽事,跑出1小時33分29秒佳績。抵死自嘲是上年紀業餘愛好者的他,說非常滿意成績:「大佬!有命返嚟同你哋講嘢喎!」又Sweet爆話有前世情人加持,跑得寧舍冧,隨即高舉左手展示由囡囡張靖搽的指甲油「晒命」:「佢叫我攰就望吓隻手,我叫佢搽埋右手,佢話唔想我咁辛苦,冇計!真係畀佢治到!跑嗰陣都望咗2、3次,尾段真係跑到想嘔。」他再搞笑同記者夾計向囡囡認叻:「喺2個鐘內跑完會有個紀念獎牌,咁我就會同佢講爸爸跑贏咗幾萬人,你哋唔好踢爆我!」

同樣跑半馬的還有DJ當奴(唐劍康)及陳健安,前者滿意刷新個人紀錄,卻不滿新手阿聰比他快約16分鐘,更笑斥對方「黐筋」;而後者因身體不適退賽。另外,參加10k賽事的有徐濠縈、釗峰、林奕匡及張紋嘉。