《後生仔傾吓偈》馮盈盈自爆被問500蚊過夜 朱智賢：我冇咁低價

有好多女藝人都曾經俾人秘密問價，日前無綫節目《後生仔傾吓偈》以「藝人負評大反擊」作話題，節目仲邀請咗胡鴻鈞、劉佩玥、朱智賢及黃庭鋒做嘉賓。喺節目開段，只係提及到麥明詩喺台慶中表演跳舞時甩beat，被網民指跳得太核突！另一主持馮盈盈就向麥明詩指出全個舞台51人，網民觀眾淨係留意佢一個，被麥明詩反駁係咪妒忌佢，從而引伸到「做藝人係咪要厚面皮」呢個話題！

主持同嘉賓提及到大家通常被問價嘅時候有幾多錢，主持陸浩明（6號）就表示其實女藝人被問價真係好常見，當嘉賓朱智賢一聽到就非常大反應，佢仲表明自己係清白並唔係做開呢啲！有見及此，馮盈盈就即刻出聲問朱智賢咁嬲係咪因為啲人出手太低開價太少，更加講道：「我試過俾人inbox問我$500過埋夜得唔得？」嘩..真係聽到覺得少，唔知係咪因為盈盈佢已經明花有主，已經被男朋友私有化所以出手低啲呢？當盈盈咁樣表達時，真係令到一眾主持嘉賓一齊拍枱大笑。而呢個時候，朱智賢就話自己冇咁低價。

當大家都笑完馮盈盈再聽完朱智賢講之後，麥明詩就大爆自己曾經私下俾人inbox問500萬一晚得唔得！聽到馮盈盈即時瞪大眼O晒咀，仲要即刻講：「有冇搞錯！我覺得我封鎖啲人係啱㗎，啲人一啲都唔尊重女性！」

其後，到胡鴻鈞再發言時就表示有人討論區話佢咸濕，仲會加插一啲茄子同香蕉嘅圖案。而馮盈盈更即時加咀表示網民都會喺討論區到話佢咸濕，佢就好質疑啲網民點解要咁講，唔可以讚自己斯文有氣質嘅咩！呢句說話一出，令到全部主持嘉賓全場安靜，埸面搞笑！