雅虎香港新聞 必試招牌台式蔥油雞+香濃奶油蝦煲 太子人氣台灣菜小店荔枝角重開
呢間餐廳本身係位於太子花園街嘅人氣台菜小店，主打蝦煲，但兩年前因租約問題無奈結業，不過餐廳最近原來已經另覓新址於荔枝角重開喇！新店於荔枝角工廈內，地方大咗闊落啲，食都食得舒服啲～食物方面繼續有得食返一系列主打嘅特色台灣菜，如招牌台式蔥油雞及奶油蝦煲等，另外午市都好多元化，連台式一人一鍋都有得食～
招牌台式蔥油雞（$268）
嚟到當然必叫招牌台式蔥油雞，特意選用三黃雞，肉質嫩滑有雞味。製作方法就有自家製嘅台式滷水浸熟，鹹甜比例恰到好處，再加埋蔥油就再香啲添！
奶油蝦煲（$188）
奶油蝦煲同樣係餐廳嘅另一名菜。先加蒜蓉及洋蔥爆炒起鑊，等配料散發香味時加入海蝦煎香會更惹味，煎到大約六成熟就落牛油，然後用中火慢煮，火候控制得好個汁先會creamy！未上皮枱已經聞到陣陣香氣，而且每隻蝦都有事先處理乾淨，食得安心又好味。
火焰雪山加州鱸魚（$188）
有稍微改良過嘅火焰魚，台灣方面用大多用淡水魚，缺點係比較多骨，所以老闆就改用加州鱸魚取代。呢隻魚嫩滑得嚟魚油豐富，食嘅時候建議先加青檸汁，然後點鹽食，先食魚肉本身鮮味，之後再點埋自家製酸辣醬汁，味道就更有層次～上枱時會倒白蘭地然後點火，吸睛之餘更有助僻腥！老闆最推介大家食魚肚位置，滿滿都係骨膠原呀。
醉雞卷（$98）
醉雞卷製法都比坊間更有誠意，分三次入酒，第一次先用酒醃味，然後浸酒，最後食前淋酒上面，酒味啱啱好～
手工黑糖花生麻糬（$38）
自家製手工黑糖花生麻糬，口感煙韌，帶有黑糖及花生香氣，唔會太甜，作為飯後甜品就最啱！
午市台式一人一鍋（$62）
除咗以上嘅晚市小菜，午市餐廳食物選擇都好多，如酸辣米線及咖喱飯等，最抵食仲係台式一人一鍋，$62就包湯底、三個配菜及一個麵底，以香港地物價嚟講叫幾抵食！
地址: 荔枝角青山道489-491號香港工業中心A座2樓A13號舖
