雅虎香港新聞 必食自家製Pizza+麻糬鬆餅 尖沙咀新開4,000呎木系Cafe
尖沙咀又有新Cafe開張！佔地4,000呎加上木系為主嘅裝修、日本傢具、大玻璃窗等，感覺舒適悠閒。餐廳主打西日Fusion菜，食物用心有水準，好似自家製香脆批底嘅手工Pizza、挑選日本四元豚製作叉燒嘅酸種包吐司。仲有嚟自人氣網店嘅鬆餅，配精品咖啡當下午茶一流！
HOW to live well由觀塘工廈搬到尖沙咀，枱、櫈、梳化等依然大部分由自家代理嘅日本傢俱品牌製作，店內亦有其他生活雜貨，仲會不定期舉辦展覽同活動，係集多項元素於一身嘅概念店。食物方面改良咗觀塘店嘅一啲招牌菜，再加入新菜式，更多選擇。
日本四元豚叉燒·班尼迪蛋·酸種包（午市$118，晚市$158）
以四元豚梅肉加上玫瑰露酒、叉燒醬、海鮮醬等醃過夜至入味，再烤熟成為叉燒。四元豚肉嘅特點就係肉質爽口，連肥膏食落都係爽脆唔油膩，做成叉燒咬落彈牙鬆化，脂香同海鮮醬嘅甜味夾埋啱啱好！配埋班尼迪蛋、蕃茄、生菜，同外脆內鬆軟嘅酸種包，味道同口感層次都相當豐富。
日式櫻花蝦芝士玉子燒（$98）
用日式玉子燒做法，一層層軟嫩多汁嘅雞蛋當中加入Mozzarella芝士、櫻花蝦等，趁熱食仲有拉絲效果！表面灑上大量櫻花蝦、紫菜、鰹魚碎等增加香氣同口感，開心Share當開胃小食就啱晒。
香煎軍曹魚扒·南瓜蓉·白蘆筍·青檸椰青忌廉汁（午市$138，晚市$178）
選用肉質柔軟，油分較多嘅軍曹魚扒，以煎焗方式帶出魚肉鮮味。配搭微甜嘅南瓜蓉同細嫩嘅白蘆筍。亮點在於米黃色嘅青檸椰青忌廉汁，用椰青嘅清甜同青檸皮嘅清香，既可以襯托出魚香，同時味道清爽，好啱夏天食！
蔥油腸·煙肉·白菌·洋蔥·番茄醬薄餅（$158）
薄批底用自家配方麵糰，低溫發酵後再高溫烤焗而成，口感外脆內煙韌帶麵粉香，特別係批邊食落有啲似餅乾咁好香口。有泰式、素食等唔同口味，呢款就配搭瑞士風味蔥油腸、煙肉絲等，肉味濃郁之餘又有香草同芝士香，味道豐富。而且值得一讃嘅係焗嘅火候時間啱啱好，批底香脆而配料保持濕潤。
Grandma’s Scones（$78/2件）
由人氣IG店Grandma's Scones供應，有多款口味選擇，好似開飯仔採訪當日就有原味楓糖、抹茶黑糖麻糬、日式焙茶麻糬、Baileys甜酒，同伯爵奶茶呢五款。口感外脆內軟，非常鬆化。人氣口味日式焙茶麻糬聞起嚟有濃郁茶香，焙茶甘香帶甜嘅味道同軟糯微甜嘅麻糬好夾。原味楓糖就有淡淡楓糖甜味，配果醬同Clotted Cream食可以增加味道變化。
Hand Drip Coffee（$78起）
餐廳用嘅House Blend或者單品咖啡豆都係請炒豆師喺本地烘焙，用日本KINTO Slow Coffee Style濾杯（順帶一提佢哋都有賣咖啡用品，包括呢個濾杯）手沖，特點係沖出嚟嘅咖啡口感更醇厚。開飯仔試嘅係咖啡師推介嘅Hacienda La Esmeralda Geisha Blue Label，花香突出帶少少柑橘香，飲落就有檸檬嘅微酸，酸感明亮，感覺乾淨清新。
Raw Coffee（$68）
夏天唔少人會點Coffee Tonic，但坊間大部分Tonic Water都有少少苦味。所以餐廳特別設計呢杯Raw Coffee，用House Blend嘅Double Espresso配搭青檸梳打，而青檸梳打嘅杯邊沾滿庶糖，所以將咖啡倒入梳打後，飲嘅時候會連埋庶糖，甜味帶起青檸嘅酸同咖啡嘅香醇，配搭梳打氣泡清涼嘅口感，非常消暑醒神。
HOW to live well
地址：尖沙咀河內道18號K11購物藝術館2樓201號舖
