雅虎香港新聞 
怪獸媽唔准Year 4女兒拍拖 網民怒斥：硬頸嗰個係你！
撰文:飛天中女Juicy媽
【親子王國分享】
有個媽媽開Post話佢個女今年讀緊大學Year 4，成績好到可以攞獎學金，唔使阿媽畀錢交學費，平時又幫人補習自己賺生活費，好生性！不過樓主有一樣嘢睇唔過眼，就係囡囡最近開始拍拖！樓主覺得「大學生拍咩拖啫，書都未讀完，應該讀完書出嚟做嘢先拍拖」，但囡囡唔同意，反駁如果出嚟做嘢先拍，啲「筍盤」就畀人揀晒啦！但樓主唔認同，仲覺得係阿女硬頸，結果兩母女成日為咗呢件事嘈交，所以樓主諗住開Post集思廣益，問吓大家應該究竟點說服個女喎……
樓主此Post一出，一日內立即引嚟近300個回覆，大部分網民都覺得樓主先係硬頸嗰個，佢哋嘅論點主要分為三個方向：
1. 而家中四都管唔到啦，何況大四？
樓主個女讀得大四即係年齡都起碼20歲或以上，一眾網民都覺得呢個年紀已經係大人，「有自己獨立思想」，如果個女想，分分鐘自己簽名結婚都仲得，佢仲肯同阿媽講拍拖啲嘢其實已經好好！同埋個女都已經開始咗拍拖啦，仲邊度有得阻止？如果格硬棒打鴛鴦，只會令阿女對阿媽愈嚟愈反感，以後乜都唔同阿媽講！
2. 唔成熟又冇錢＝冇資格拍拖？
傾傾吓樓主似乎都係唔認同大家嘅留言，於是加多句：「個個都支持大學生可以拍拖，佢哋有咩資格拍先，冇錢又未成熟。」果然即刻又引嚟更多人瘋狂回覆，話覺得硬頸嗰個係樓主就真！
有人指出一個人成熟與否同年齡根本冇關係，而且「大把人3、40歲諗嘢都小學雞啦」！唔少網友都認為，讀書時拍拖，如果分手，就當係經一事長一智嘅機會，「可以睇清楚男人真面目，學識點同男人相處，知道自己想點」；如果唔分手嘅，就係大家一齊變得更加成熟！
仲有呀，Juicy媽真係唔明，冇錢就冇資格拍拖？咁係咪即係所有基層人士都慼該匿喺屋企做「毒男」、「宅女」，然後慨嘆「這些機會不是屬於我的」？Juicy媽好好奇，究竟樓主當年係幾歲開始拍拖呢？拍拖時銀行戶口又有幾多錢呢？
3. 出嚟做嘢先拍拖，啲好仔畀人Mark晒啦！
好多網民都讚同阿女嘅諗法，如果等到出嚟工作先尋覓另一半，一嚟「返工好忙何來咁多時間去識人」，二嚟「返工後生活圈子會窄好多」，三嚟「職場識嘅人亦較大學生複雜」，可能會因為利益先加以追求！
其中有網友嘅朋友就係一路太聽嚴母話，「大學有人追都唔敢拍，就算30幾歲人出街去到10點，屋企人一定打十幾個電話要佢返屋企，怕佢同男仔出街，到而家就40歲，佢阿媽又日嘈夜嘈佢冇拖拍嫁唔出」，讀書時唔畀拍拖，畢業又Chur結婚，Juicy媽真係睇唔透，究竟呢啲阿媽想個女點呢？
Juicy媽嗰個年代就話興用「中學生應否談戀愛」嚟就作文題目啫，估唔到而家個層次變咗討論「大學生應否談戀愛」！樓主最後畀唔畀囡囡讀大學拍拖，決定權始終喺佢度嘅，不過學網民話齋，阿女都已經大四，「有自己獨立思想」，樓主覺得硬碰硬有用嘅都可以即管使吓嘅！加油！
入討論區一齊傾
