恨做一姐出晒面!吳若希搵陳定幫批事業運
無綫人事變天,星夢娛樂行政總裁何哲圖(Herman)於本月底離任,另起爐灶開設新公司,唔少人都關心其一班「星夢愛將」嘅去向之際,巧合地歌手吳若希(Jinny)日前拍片搵堪與學家陳定幫預測運程時,就被批今年工作上容易有轉變,甚至有機會轉公司,唔通意味住佢可能跟Herman離巢過檔?
陳定幫續指Jinny轉變後會有不錯效果,佢即直言:「我有冇機會做一姐?」對方即時口窒窒唔敢亂答,嚇得佢大叫:「點解你咁嘅反應㗎?」並連番追問:「咁我係咪做唔到一姐?」場面搞笑,而對方則寄語佢若然太刻意爭取反而會有反效果。
另外,講到佢子女緣旺有機會生第3胎,佢即時耍手擰頭,更講笑話希望老公做結紮手術,以免佢再度懷孕。