應屆DSE考生 炎明熹考兩科中間一日空檔來回肇慶登台

憑TVB《聲夢傳奇》入行嘅炎明熹(Gigi)，一向都要兼顧學業同演出，試過一放學就換衫去叱咤記者會！Gigi參加內地節目《聲生不息》之後，就連內地市場都擸埋，加上兩地疫後開關，直情要跨境走場。

炎明熹係今屆DSE考生，但係工作似乎未有停止。最近Gigi拍咗條內地宣傳片，叫大家支持佢有份演出、喺廣東省肇慶舉行嘅群星演唱會。

不過睇返日子，演唱會喺4月22日晚上舉行，而DSE第一科開考嘅英國語文，分別喺4月21號考卷一卷二，4月22日上晝就考聆聽及綜合能力。由於英文係DSE核心科目，想繼續喺香港大專院校升學嘅話一定要考，而香港坐車去肇慶最快都要4個鐘，換言之Gigi考完試就要出發北上，唱完show趁星期日回程時溫書最後衝刺，因為第二日要去考數學！而接住嗰個禮拜一至四都係DSE核心科目（中文、通識、數學）考期，真係相當chur。

其實未到開考期，Gigi仍然有唔少工作，最近派咗新歌《大開眼界》上台之外，日前更參與TVB慈善騷《博愛歡樂傳萬家》以及喺澳門舉行嘅《無限超越群星演唱會》，希望Gigi有時間等埋位時溫書，考個好成績啦。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！