戀講嘢｜ 口罩小姐Liz曾與渣男歌手拍拖 網民化身柯南搵出疑似男主角

由郭嘉駿（193@ERROR）、譚凱倫（Helen）、鄭伊琪（浩南）及郭奕芯（Ashina）主持嘅ViuTV節目《晚吹 - 戀講嘢》，每集都會邀請唔同嘅嘉賓分享愛情經歷。最新一集（19日）就搵嚟口罩小姐「肥妹」李文潔（ Liz）擔任嘉賓，Liz分享與某歌手嘅一段感情經歷，期間仲大爆男方嘅渣男行為。節目出街後，唔少網民都好好奇Liz所講嘅係邊一位男歌手。

Liz指佢同呢位前度男友喺6年前經朋友介紹下認識，而男方係一個曾經有好多粉絲，及舉行過演唱會嘅男歌手，二人相識不久後便發展成情侶關係。呢位前男友並冇努力爭取工作機會，終日游手好閒，成日掛住瞓覺同飲酒，而做模特兒嘅Liz就努力工作搵錢。佢眼見Liz賺錢俾自己多，索性就問Liz攞錢還債及開口求包養。前男友亦因合約問題負債幾十萬，所以佢先後問Liz及朋友借錢還俾公司，後來同朋友反面後就問Liz借錢還俾朋友。

除此之外，佢哋喺拍拖一個多月後，前男友突然透露自己有一個仔，囝囝嘅媽媽仲要係佢嘅粉絲，佢哋曾經係戀人關係，而囝囝就交由女方照顧，贍養費就由男方父母支付。Liz仲透露二人喺拍拖期間有唔少拗撬，男方仲試過撞佢個頭埋牆，及發生肢體碰撞，最後男方話要返內地生活，二人戀情半年告終。

一班網民齊齊化身柯南，猜測究竟渣男主角係邊個？之前有人估過係張致恆，不過Liz就公開否認，並指男方已經轉行。節目出街後，網民透過Liz所提供嘅資料去搵出男主角身份，最後有網民指男主角好有可能係亢帥克，仲發現Liz同佢喺16年嘅合照，時間非常吻合！現年34歲嘅亢帥克，2009年參加《亞洲星光大道》，並以亞軍成功出道。喺入行後亢帥克作多方面發展，先後出過唱片、擔任節目主持及舉行小型演唱會等等，不過可惜發展平平，現時已返回廣東發展。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！