我真係恭喜你呀！李嘉欣電影經典

今日係大美人李嘉欣生日，祝美人生日快樂╴身體健康！大美人出道多年依然以靚絕的外貌無間斷有工作，不過翻查資料一睇，原來李嘉欣近年已經好少拍戲，可能因為要照顧家庭，拍戲時間唔夠彈性啩。今日藉住佢生日大喜日子，回味下李嘉欣的電影角色！

1990年《倩女幽魂2之人間道》

李嘉欣88年參選港姐成為冠軍，一當選已經紅，所以無論拍電視劇定拍電影都夥拍一線明星。《倩女幽魂》當年好受歡迎，續集雖然同第一集無咩關係但有原班人馬。大美人喺《倩女幽魂2》夥拍張國榮、王祖賢、張學友同午馬，做王祖賢嘅細妹月池，懵懂天真又帶啲倔強都幾正，海報都分到畫面四分一㗎。出道2年來講算好勁下。

92年《妖獸都市》

改編自日本同名漫畫，講述世界有人類有妖獸但最恐佈嘅係內心。妖獸不一定害人，但人類可以為利益出賣同伴，好壞無分種族，故事概念早過X-men多多聲！電影由徐克做監製，美感有一定要求，特技當然不能同依家比較，不過鏡頭光影非常唯美。其實套戲尺度幾大，有唔少裸露同血腥場面，港產cult片迷不容錯過！李嘉欣戲中飾演妖獸幻姬，又同男主角黎明有場雨中纏綿戲，總之每次出場都好靚下。同片仲有張學友、張耀揚同李若彤。

93年《方世玉》、《方世玉2》

李連杰飾演方世玉，蕭芳芳做苗翠花、鄭少秋做陳家洛，雖然李嘉欣角色唔夠蕭芳芳咁搶同咁重戲份。不過，無左「雷婷婷」呢個角色就無得搶親，咁成套戲都做唔落去！「雷婷婷」是誰？李嘉欣個角色方世玉個太太囉！

95年《墮落天使》

王家衛編劇導演，黎明、金城武、楊采妮同莫文蔚主演，全部都係當時得令嘅明星。李嘉欣飾演天使2號幫天使1號（即黎明）接殺人生意，憑角色獲第1屆香港電影金紫荊獎提最佳女主角提名。我相信套戲係講寂寞，但當年宣傳重點去左大美人2場自慰戲度。呢個唔係演員問題，只能說從來觀眾都鍾意睇呢類吸晴場面。《墮落天使》喺其中一部擺脫花瓶之名嘅作品。

2002年《豐胸秘Cup》

算係李嘉欣近期擔正戲份較多嘅戲，之後多數商演活動或者客串居多。同片有吳鎮宇、吳彥祖、譚小環同Amanda S，睇個名都知係輕鬆都市笑片，當年有好多呢類romance comedy，辦公室情境加上錯摸橋段，最後男女主角共墮愛河，無咩大意義但輕鬆最緊要，畢竟98年亞洲金融危機之後大家都未回氣！