拉闊音樂會 網民熱推︱姜濤唱《Dear My Friend,》勁感動 Tyson Yoshi大騷腹肌好吸睛

由商台舉辦嘅《拉闊音樂會 風火雷電》喺噚晚（27/9）圓滿結束，四位新生代男歌手林家謙、姜濤、柳應廷（Jer）和Tyson Yoshi（程浚彥）施展渾身解數，落力演出獲現場及收睇網上直播嘅樂迷激讚精彩，而家就同大家重溫一下噚晚嘅必睇位啦！

Tyson Yoshi 成肌肉擔當
噚晚嘅SOLO部分由Tyson Yoshi打頭陣，佢喺演唱《In My Dream》時突然脫去上衣，大騷六嚿腹肌，成為當晚嘅肌肉擔當。唔少觀眾一見到佢嘅爆肌身型後隨即尖叫，掀起高潮。唔少網民紛紛留言大讚佢好型，例如「頂！好大隻呀！好正呀！尖叫中」、「連男人嘅我都忍唔到尖叫囉」、「超正！型爆」、「好正呀尋晚」、「亞博俾你焫著了！」、「搞吾掂D肌肉 屈機」、「喺屋企睇到尖叫呀」、「TY u rock!!」及「琴晚好正啊omg!! !!」等等。

姜濤唱《Dear My Friend,》好感動
姜濤除咗翻唱隊友SOLO歌及與家謙唱出從未曝光作品《有一種傳說》之外，噚晚亦唱出其新歌《Dear My Friends,》，期間更跪唱及一度哽咽，唔少網民都話睇到好感動，例如「舞台上嘅姜濤真係閃閃發光！ ，唱跳真係好好睇！唱dear my friend, 又好感動！」、「姜濤世一！Good show 呀！現場真係好震撼好感動呀！」、「聽DMF很感動，眼濕濕。謝謝姜濤勇敢面對。姜Man加油。」、「唱DMF好好聽，完全放哂感情落去唱，邊聽住你唱邊睇到你汗流如水，被你的真情感動了」、「跳唱驚喜 dmf 跪喺度唱時 真係喊咗」及「雖然去唔到現場，但係睇直播都好正呀！dear my friend 真係咸住嚟聽」等等。

林家謙大突破
一向以斯文眼鏡Look示人嘅林家謙，喺噚晚音樂會竟然罕有地表演跳舞，當唱出米津玄師的《感電》時與Dancers跳出可愛舞步，成功為觀眾帶來驚喜。網民仲讚有佢跳得好可愛，例如「跳唱可愛到不得了！」、「點解可以咁cute」、「謙謙第一次跳唱，好驚喜！」、「原來林家謙都可愛 但彈琴時又勁charm」及「林生真係好努力去學跳舞online 睇到我好感動」等等。

Jer帶病上陣仍發揮超水準
阿Jer喺舉行音樂會前，於IG透露自己氣管敏感發作，不過佢噚晚依然發揮超水準，演繹「重生系列」歌曲時全場high爆，更得到網民紛紛大讚表現出色，例如「Jer真係正到痴線 舞台感染力超勁!!! 而且佢選每一首歌既message都令人好感動 我受形柳!!」、「帶病上陣Respect」、「金Jer唱現場真係好mm7 唱歌時令聽眾會看到了歌詞既畫面 ～狂人日記全場尖叫起嚟. 知道你今日氣管可能有啲唔舒服 但發揮仍然好好！」、「柳柳唔舒服都唱到咁，真係好叻仔」、「jer唱live真係勁到爆」及「睇你表演就是一種享受！」等等。

壓軸大合唱為全晚焦點
喺音樂會尾聲時，四人合體唱出《蒙著嘴說愛你》、《未知道》及《致明日的舞》成為全晚焦點，更將氣氛推至最高峰，唔少網民都表示唔夠喉，紛紛留言話：「100分！真係唔想結束」、「大合唱蒙著嘴說愛你勁high」、「4位今晚表演好好」及「現場氣氛爆棚！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！