【搶鏡過熊家】呢班《愛·回家之開心速遞》角色好搶眼

娛樂LOL

《愛·回家》呢個系列長做長有,亦屬於比較少受網民批評嘅劇集。今輯 《愛.回家之開心速遞》 除咗因為故事劇情輕鬆搞笑之外,佢亦唔怕起用一班生面口嘅新人。而且劇集角色又夠貼地,令好多觀眾都好有共鳴,更成功令到一班配角彈起,今次就同大家數下有邊啲搶眼角色啦!

秦博思(馬貫東飾)

秦博思呢個角色應該講出好多男士嘅哀歌,劇情講述佢一直暗戀熊若水(呂慧儀飾),不過熊若水經常將擇偶條件「三才」放喺嘴邊而令到博思唔敢行動,完全陷入friendzone狀態。去到近排劇情安排Mandy暗戀博士,Mandy不停用扮拍拖呢個藉口去接近博士,去到上星期佢哋幾經波折終於喺埋一齊,唔少觀眾都鍾意佢同Mandy一齊多過熊若水,希望編劇之後唔好拆散佢哋啦!

林美香Mandy (謝芷倫飾)

個名叫得做「林美香」就當然波折過人,雖然Mandy一心中意博士一人,不過情人偏偏鍾意長腳蟹飾演既若水。早前,佢為咗討好熊若水,施展渾身解數顯示自己廚藝、知道熊樹根有脫髮問題就去買何首烏煲中藥俾佢飲。咁不屈不撓又專一嘅愛情真係令到好多觀眾動容,去到近排劇情終於安排佢同博士正式開始拍拖,令到一班觀眾都好興奮同激動。

KC 吳家聰(歐瑞偉飾)

喺第一輯《愛·回家》,KC同Terry呢對上司和下屬已經深受觀眾歡迎,嚟到今輯呢對「男男」CP繼續搶盡風頭。佢哋今次由上司下屬變成舅父外甥嘅關係,最令大家印象深刻一定係佢哋早前喺劇中大玩SM,劇情主要係話KC為幫Terry排戲,不惜戴假髮,搽鮮紅色唇膏,化身水手學生妹,被戴上面具嘅Terry用皮鞭鞭打。之後,KC被Terry打到成身傷晒,但係一聽到Terry話壓力太大搞到瞓唔著,要KC好似以前咁揹著他兼唱歌氹佢瞓。成件事真係有搞笑又有愛呀!

Terry 龍力王(李偉健飾)

有KC點可以冇Terry呢?!Terry今次係劇中飾演熱愛演戲成日想成為藝人嘅富二代。劇中佢同KC默契十足,唔少人都認為只要佢哋加埋就有種莫名嘅喜感,睇到就好想笑。

龍力蓮(林淑敏飾)

講到最突出嘅配角就一定係飾演大小姐「龍力蓮」嘅林淑敏!喺劇中飾演尖酸刻薄、脾氣暴躁嘅有錢人龍力蓮,不過佢亦好錫自己嘅秘書Mandy,好似之前佢以為秦博思玩Mandy,佢即刻搵人教訓佢要佢同Mandy道歉。唔少網民認為佢將有錢人的自負感演繹得淋漓盡致同埋尖酸刻薄得嚟唔剋人憎。

朱凌凌(吳偉豪飾)

雖然吳偉豪都算係新人,呢套劇集就令到佢成功入屋。佢同飾演金城安嘅周嘉洛喺劇中係大學同學兼好朋友,成日出雙入對。雖然有人指佢哋好有hehe feel,不過觀眾似乎就覺得佢哋嘅互動好得意同好搞笑。有唔少網民都指覺得佢演技好自然、外形討好又有喜感,比好多做咗幾年主角嘅人好好多。梗係啦原來吳偉豪每次收到劇本都會對住塊鏡練習幾個鐘,咁有心,睇好你呀!

Venus(鄺潔楹飾)

本來做無綫娛樂新聞台主播嘅鄺潔楹(Judy)因為有傲人身材而被睇中拍《3日2夜》,繼而就開始被網民留意。現年24歲,樣靚身材正嘅Judy之前就已經被網民話佢好有仙女feel,而且青春本來就係無敵,所以無論可愛、成熟、性感、斯文等咩風格都可以carry到。 唔怪得知金城安都為佢神魂顛倒啦!聽講Judy而家仲係單身㗎!

其他內容