收八心八箭求婚鑽戒 陳煒畀男友滿分 恨嫁𦧲飯應

·2 分鐘文章
陳煒展示求婚戒指,流露幸福笑容。
陳煒展示求婚戒指,流露幸福笑容。

前晚被男友求婚的準人妻陳煒,昨日手戴3卡求婚鑽戒現身活動,她透露被求婚時感動落淚,並即時Say Yes,她讚揚男友一百分,值得託付終身,承諾以後負責照顧對方的生活,但講到生兒育女就落閘Say No。

陳煒昨日出席活動時春風滿面,左手無名指上戴了3卡鑽戒,對於前晚獲醫生男友陳國強驚喜求婚,她說:「尋晚瞓唔着,因為收到好多朋友嘅祝福,我要回覆大家,所以依家都暈暈地。」她坦言事前全不知情,被求婚一刻感動落淚:「好開心咁多朋友見證,收到咁多人祝福。(係咪即時Say Yes?)係,𦧲飯應。(有冇諗過男友求婚?)唔敢諗,諗咗唔係咪好失望。(男友有咩值得你點頭答應?)對我好,以後我照顧佢生活,佢照顧我健康。(佢值得託付終身? )好好,一百分。」又大讚男友做到嘢:「因為佢喺我心目中只係識救人同醫人,乜都唔識,估唔到今次咁多嘢都係佢設計同話事,好叻!」

冇諗過生小朋友

至於婚禮安排及細節,陳煒稱暫時未有任何想法,問到會否交由男友全權負責?她說:「以我嘅性格唔會,我都會參與。(會唔會生小朋友? )唔使喇掛,我冇諗過。(婚後減產?)未諗過,因為發生得太突然。」另外,她透露求婚戒指是朋友設計,由2隻戒指組合而成,八心八箭的切割很有意思,而圍邊的鑽石是有關他們的秘密故事。

何國鉦朱晨麗喊到豬頭

有份見證求婚過程的本地著名時裝設計師何國鉦、朱晨麗及岑麗香都替2人感開心,何國鉦稱守秘密守得辛苦,又指過程感動:「我係第一個喊,同朱晨麗喊到豬頭咁,陳煒太好人,好值得人錫,我哋成日笑佢男友坐喺度食殘廢餐。」並稱會送親自設計的婚紗作賀禮。朱晨麗則笑言:「以前都叫佢男友做姐夫,依家可以名正言順咁叫!」而陳國強美容院的拍檔黃智賢因身在內地拍劇,未能出席派對,他戥對方開心並祝2人幸福美滿。

陳煒大讚男友「做到嘢」,竟能悉心安排求婚派對。
陳煒大讚男友「做到嘢」,竟能悉心安排求婚派對。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能