政Whats噏:不滿被指人渣 陶傑發律師信越洋狀告蕭若元

·1 分鐘文章
蕭若元指稱陶傑為人渣,可能惹來誹謗訴訟。
蕭若元指稱陶傑為人渣,可能惹來誹謗訴訟。

本地作家陶傑,同綽號「燈神」嘅商人蕭若元,近日因談論美國總統大選而觸發兩人多年來嘅宿怨。上周六(7日)蕭若元喺其視訊頻道以「乜嘢係人渣?陶傑點解係人渣?」為題,惹起陶傑不滿,表明會出律師信越洋狀告目前身在台灣嘅蕭若元。

據悉,蕭若元於該段視頻裏面,親自解釋佢同陶傑結怨嘅因由,又引述一位自稱係陶傑舊相識嘅信件,指控陶傑過去喺英國求學期間種種不堪回首嘅往事。而陶傑就喺電台節目中表示要控告蕭若元誹謗,至於蕭若元目前身在台灣,到底要喺台灣還是香港入禀,陶傑未有明確答覆,只係話總有辦法將律師信送抵蕭若元手中。

陶傑同蕭若元嘅結怨,始於數年前嘅中東難民潮,當時陶傑認為可以將難民拖出公海,或用機關槍射,蕭若元就鬧爆話不可接受,揚言要將陶傑嘅言論翻譯成17國語文並寄去相關嘅領事館,陶傑就怒斥此舉「極為惡毒」。早前陶傑喺其電台節目中,嘲諷蕭若元預測美國總統特朗普「山泥傾瀉」式大勝,結果係燈神搭沉船「燈」死特朗普。其後蕭若元就喺其視訊頻道大罵陶傑係人渣,又讀出一封聲稱係英國華人嘅來信,爆出陶傑負笈英倫期間所干犯嘅刑事行為。儘管該視頻後來被刪除,但陶傑似乎按捺不住,話要狀告蕭若元誹謗。

【相關搜尋】蕭若元旗下冰室5客食物中毒

【相關搜尋】陶傑廁紙包頭事件